பிரதமர்  நஜிப்  அப்துல் ரசாக் விரும்பினால்  கேள்விகளுக்குப்  பதிலளிக்காமல்  இருக்கலாம்  என்று  கூறியதன்வழி  பிரதமர்துறை  அமைச்சர்  அஸலினா  ஒத்மான்  நாடாளுமன்ற  நடைமுறைகளைத்  தலைகீழாக  மாற்றப்  பார்க்கிறார்  எனக்  குற்றம்  சாட்டப்பட்டுள்ளது.

பிரதமர்  நஜிப்  அப்துல்  ரசாக்குக்கு  கேள்விகளுக்கு எப்போது  பதிலளிக்கலாம்  என்பதைத்  தீர்மானிக்கும்  அதிகாரம்  இருப்பதாகவும்  அதன்படி  அவர்  1எம்டிபி, ரிம2.6 பில்லியன்  நன்கொடை  ஆகியவை  பற்றி  விரும்பும்போது  பதிலளிக்கலாம்  என்றும்  அஸலினா  நாடாளுமன்றத்தின்  முதல்  நாள்  கூட்டத்தில்  கூறியிருந்தார்.

“விரும்பும்போது  1எம்டிபி  பற்றிப்  பதிலளிக்கும்  உரிமை  பிரதமருக்கு  உண்டு  என்று (அஸலினா)  கூறி  நாடாளுமன்றத்தை  மிகவும்  அவமதித்து  விட்டார்”, என  டிஏபி  மூத்த  தலைவர்  லிம்  கிட்  சியாங்  ஓர்  அறிக்கையில்  கூறினார்.

அப்படிக்  கூறியதன்வழி  ஒரு  மோசமான  முன்மாதிரியை  ஏற்படுத்தி  விட்டார்  என்று  குறிப்பிட்ட  லிம்,  இனி  பிஎன்  நாடாளுமன்ற  உறுப்பினர்களும்  அவர்களை  நோக்கிக்  கேள்விகள்  தொடுக்கப்படும்போது  இதே  பதிலைச்  சொல்லத்  தொடங்குவார்கள்  என்றாரவர்.