பாஸ் தேர்தல் இயக்குனர் முஸ்தபா அலியும் பாஸ் சட்டமன்ற உறுப்பினர் ஹுசாம் மூசாவும் நேருக்கு நேர் வாதமிடுவதாக இருந்தால் அதற்கான ஏற்பாடுகளைச் செய்ய கிளந்தான் பாஸ் இளைஞர் பகுதி முன்வந்துள்ளது.
பாஸ்-அம்னோ இணைப்புக்காக பாடுபட்டவர்களில் முஸ்தபாவும் ஒருவர் என்றும் அதற்காக அவர் அம்னோ தலைவர்களைச் சந்தித்தார் என்றும் ஹுசாம் கூறியதுதான் அவர்களுக்கிடையில் சர்ச்சை மூள்வற்குக் காரணம்.
அக்குற்றச்சாட்டுக்குப் பதிலளித்த முஸ்தபா அது பற்றி ஹுசாமுடன் நேரடியாக வாதிக்க தயார் என்று மலாய்மொழி நாளேடு சினார் ஹரியானிடம் தெரிவித்தார். அந்த நேரடி விவாதத்தை கிளந்தான், கோத்தா பாருவில் வைத்துக்கொள்ளலாம் என்றும் அவர் கூறினார்.
இந்நிலையில்தான் கிளந்தான் பாஸ் இளைஞர் தலைவர் அஹமட் ஃபாத்லி ஷாரி ஹுசாம்- முஸ்தபா விவாதத்துக்கு மேடை அமைத்துக் கொடுக்க முன்வந்திருக்கிறார். அந்நிகழ்வுக்கு நிறைய பேர் வருவார்கள் என்றும் அவர் சொன்னார்.
“இது அவ்விவகாரம் பற்றி சம்பந்தப்பட்டவர்களே விளக்கமளிப்பதைக் கேட்பதற்கு ஒரு வாய்ப்பாக அமையும்”, என்றாரவர்.
