மருந்துகளின் விலைகள் போன்ற விவகாரங்களுக்குச் சரியான விளக்கங்கள் கூறப்படவில்லை என்பதால் பசிபிக் வட்டார பங்காளித்துவ ஒப்பந்த(டிபிபிஏ)த்துக்கு எதிராக கேள்வி கேட்பதை டிஏபி நிறுத்தாது.
மருந்துகளின் விலைகளில் டிபிபிஏ-ஆல் ஏற்படக்கூடிய தாக்கம் என்னவென்பது மலேசியர்களுக்கு இன்னும் தெரியாமலேயே இருக்கிறது என டிஏபி தலைமைச் செயலாளர் லிம் குவான் எங் இன்று ஓர் அறிக்கையில் கூறினார்.
“டிபிபிஏ-இன் விளைவாக ‘உயிரியல்’ மருத்துவ பொருள்கள் என்று கூறப்படுவன உள்பட மருந்து விலைகள் உயருமா என்ற கேள்விக்கு இன்னும் விடை கிடைக்கவில்லை.
“மனுக்குலத்தின் எதிர்கால நம்பிக்கை என்று போற்றப்படும் உயிரியல் மருந்து பொருள்களுக்கு வழங்கப்படும் ஐந்திலிருந்து- எட்டாண்டுக்கால பாதுகாப்பு அதிகம் என்று தோன்றவில்லையா?”, என லிம் வினவினார்.
உரிமைப் பாதுகாப்பு தவறாகப் பயன்படுத்தப்படக்கூடிய அபாயமும் இருக்கிறது. இதற்கும் டிபிபிஏ-இல் தீர்வுகூறப்படவில்லை என லிம் கூறினார்.
“Turing Pharmaceuticals நிறுவனம் எச்ஐவி நோயாளிகளின் உயிர்காக்கும் மருந்தின் விலையை ஒரே நாளில் 5,000விழுக்காடு (யுஎஸ்$13.50-இலிருந்து $750 ஆக) உயர்த்தியது நமக்குத் தெரியும்.
“இந்த விலையேற்றம் 2015 ஆகஸ்ட்/ செப்டம்பரில் ஒரு முதலீட்டாளர் அந்த மருந்துக்கான காப்புரிமை பாதுகாப்பைப் பெற்றவுடன் நிகழ்ந்தது”, என பினாங்கு முதலமைச்சருமான லிம் கூறினார்.
