இயல்பான வாக்காளர்  பதிவுமுறையை  அமல்படுத்துவது  கடினம்,  ஏனென்றால்  அது  மலேசிய  தேர்தல்  முறையில்  பெருந் தாக்கத்தை  ஏற்படுத்தும்  எனத்  தேர்தல்  ஆணையத்  தலைவர்  அப்துல்  அசீஸ்  யூசுப்  கூறினார்.

அரசமைப்பு  பிரிவு 119, குடிமக்களுக்கு  ஒரு விருப்புரிமை  அளிக்கிறது  என்றாரவர். அவர்கள்  விரும்பினால்  வாக்காளராகலாம்,  வேண்டாம்  என்றால் பதிவு  செய்துகொள்ளாமல்  இருக்கலாம்.

இயல்பாக  வாக்காளராகும்  முறைக்கு  மாற  வேண்டுமானால்    அரசமைப்பின்  119வது  பிரிவையும்  அது  தொடர்பான  விதிமுறைகளையும்   திருத்த  வேண்டும்.

“திருத்தம்  செய்வதற்கு  மூன்றில்  இரண்டு பங்கு  பெரும்பான்மை  தேவைப்படும்  என்பதையும்  கவனிக்க  வேண்டும். எல்லாக்  கட்சிகளும்  ஒப்புக்கொண்டால்  மட்டுமே  அதைச்  செய்ய  முடியும்.

“மேலும், அம்முறை  அமல்படுத்தப்பட்டால்   வாக்காளர்  பட்டியலிலும்  பெருந்  தாக்கத்தை  ஏற்படுத்தும்”, என்றவர்  இன்று  ஓர்  அறிக்கையில்  கூறினார்.

இயல்பான  வாக்காளர்  பதிவுமுறை  அமலுக்கு வந்தால்  அடையாள  அட்டையில்  தங்களின்  முகவரியை  இற்றைப்படுத்திக்  கொள்ளாமல்  வேறு  இடங்களுக்கு  மாறிச்  சென்றவர்கள்  பிரச்னையை  எதிர்நோக்குவார்கள்.

அடையாள  அட்டையில்  உள்ள  முகவரியை வைத்துத்தான்  வாக்காளர்  பட்டியல்  தயாரிக்கப்படுகிறது  என்றவர்  சொன்னார்.