அம்னோ  உச்ச  மன்றம்   பிரதமர்  நஜிப்  அப்துல்  ரசாக்கைக்  கட்டுப்பாட்டில்  வைத்திருக்க  வேண்டும்  என்று  முன்னாள்  அமைச்சர்  ரபிடா  அசீஸ்  அம்னோ  அறிவுறுத்தியிருப்பதை  அம்னோ  உச்ச  மன்ற  உறுப்பினர்  நஸ்ரி  அப்துல்  அசீஸ்  நிராகரித்தார்.

ரபிடா   விரும்பியதைப்  பேசலாம்.  ஆனால்,  அவருடைய  பேச்சு  எடுபடாது  என  நஸ்ரி  கூறினார்.

“ரபிடா ஒரு  செல்லாக்காசு.  நம்  நாட்டில்  பேச்சு  சுதந்திரம்  உண்டு. அவர்  விரும்பும்வரை  குரைத்துவிட்டுப்  போகட்டும்”, என  நஸ்ரி  புத்ரா  ஜெயாவில்  செய்தியாளர்களிடம்  கூறினார்.

நீண்ட  காலம்  அம்னோ   மகளிர்  தலைவியாக  இருந்த  ரபிடா, நேற்று  செய்தியாளர்களிடையே  பேசியபோது,  உச்ச  மன்றம்  நஜிப்புக்கு  உள்ளதை  உள்ளபடி  எடுத்துரைக்க  வேண்டும்  என்று   குறிப்பிட்டு  அதை  வலியுறுத்த   சிறுவர்  கதையான   சட்டை  அணியாத  சக்கரவர்த்தி  கதையையும்  கூறினார்.