தாய்லாந்தின் நராதிவாத்தில், தீவிரவாதிகள் ஜோக் இரோங் மருத்துவ மனையிலிருந்து அருகில் உள்ள இராணுவ முகாம்மீது தாக்குதல் நடத்தியதில் தாய்லாந்து பாதுகாப்புப் படையினர் எழுவர் காயமடைந்தனர்.
முன்னதாக, தீவிரவாதிகள் அவ்வட்டார இரயில்வே நிலையத்தைத் தாக்கியதாக ஜோக் இரோங் போலீஸ் தலைவர் கர்னல் பிரவிட் சோசெங் தெரிவித்தார். அதன் பின்னர் இராணுவ முகாம்மீது துப்பாக்கியால் சுட்டிருக்கிறார்கள்.
“பிற்பகல் 3.55க்கு இரயில்வே நிலையத் தாக்குதலுக்குப் பின்னர் பொதுமக்கள்போல் வேடமிட்ட 10 தீவிரவாதிகள் மாவட்ட மருத்துவ மனைக்குள் நுழைந்து அங்கிருந்து மருத்துவ மனைக்குப் பின்புறத்தில் உள்ள இராணுவ முகாமைத் தாக்கத் தொடங்கினார்கள்”, என பிரவிட் ஊடகங்களிடம் தெரிவித்தார்.
தீவிரவாதிகளும் பாதுகாப்புப் படைகளும் ஒரு மணி நேரத்துக்குமேல் துப்பாக்கியால் சுட்டுக் கொண்டார்கள். அதில் பாதுகாப்புப் படையினரில் எழுவர் காயமடைந்தனர். மூவர் கவலைக்கிடமான நிலையில் உள்ளனர்.
