கோலகங்சார் மற்றும் சுங்கை புசார் ஆகிய தொகுதிகளில் நடைபெறவிருக்கும் இடைத் தேர்தலில் பாஸ் கட்சியுடன் போட்டியிட்டு வாக்குகளைச் சிதறடிக்க வேண்டாம் என்று பாஸ் கட்சியின் தலைவர் அப்துல் ஹாடி அவாங் இதர கட்சிகளுக்கு வேண்டுகோள் விடுத்துள்ளார்.

இவ்விரு தொகுதிகளிலும் இந்த இஸ்லாமியக் கட்சிக்கு வலுவான ஆதரவு இருப்பதால் போட்டியிடுவதற்கு அக்கட்சியே சிறந்த தேர்வாக இருக்கும் என்று அவர் காரணம் கூறினார்.

“இந்த நாட்டில் மாற்றத்தை காண விரும்பும் கட்சிகள் அனைத்தும் பாஸ்சின் நிலைப்பாட்டை மதிக்க வேண்டும். சச்சரவில் இறங்காதீர்”, என்று அவர் கேட்டுக்கொண்டதாக சினார் ஹரியான் கூறுகிறது.

பாஸ் கட்சியும் அதிலிருந்து பிரிந்து சென்றுள்ள அமனாவும் இவ்விரு தொகுதிகளிலும் போட்டியிடும் நோக்கத்தைக் கொண்டிருக்கின்றன.

கோலகங்சார் மற்றும் சுங்கை புசார் ஆகிய இரு தொகுதிகளிலும் ஜூன் 18 இல் தேர்தல் நடத்த தேர்தல் ஆணையம் முடிவு எடுத்துள்ளது.