அரசாங்கம் அவசரத் தடங்களைப் பயன்படுத்தும் சாலைப் பயனர்களைத் தண்டிப்பதற்குப் பதிலாக நெடுஞ்சாலைகளில் போக்குவரத்து நெரிசலைத் தவிர்க்கத் தவறிய சாலைப் பராமரிப்பு நிறுவனங்களைத்தான் தண்டிக்க வேண்டும் என்கிறார் பாஸ் துணைத் தலைவர் துவான் இப்ராகிம் துவான் மான்.
அவசரத் தடங்கள் அவசர வேளைகளில் பயன்படுத்துவதற்காக மட்டுமே என்பதை ஒப்புக்கொண்ட துவான் இப்ராகிம், போக்குவரத்து நெரிசலுக்குத் தீர்வு காணாமலிருப்பதற்குப் பொறுப்பு சாலைப் பராமரிப்பு நிறுவங்கள்தான் என்றார்.
இவ்வாண்டு அவசரத் தடங்களைத் தவறாகப் பயன்படுத்துவோர்மீது கவனம் செலுத்தப்படுகிறது.
“பிரதமர்கூட முகநூலில் இவ்விவகாரம் குறித்துக் கருத்துரைத்துள்ளார்”, என துவான் இப்ராகிம் இன்று வெளியிட்டிருந்த அறிக்கையில் கூறினார்.
அவசரத் தடங்களைப் பயன்படுத்துவோரைத் தண்டிப்பதால் மட்டும் இப்பிரச்னைக்குத் தீர்வு கண்டு விட முடியாது என்றாரவர்.
போக்குவரத்து நெரிசல் ஏற்படுவதற்கான மூல காரணத்தைக் கண்டறியாமல் சாலைப் பயனர்களுக்கு அபராதம் விதிப்பது நியாயமாகாது . எதனால் விழாக் காலங்களிலும் விடுமுறை நாள்களிலும் சாலைப் பயனர்கள் அவசரத் தடங்களைப் பயன்படுத்த வேண்டிய கட்டாய நிலைக்கு ஆளாகிறார்கள் என்பதைக் கண்டறிய வேண்டும்.
“போக்குவரத்து நெரிசலுக்குத் தீர்வு காணத் தவறும் சாலைப் பராமரிப்பு நிறுவங்களுக்குத்தான் அபராதம் விதிக்க வேண்டும் ” ,என்று கூறிய துவான் இப்ராகிம் அப்பிரச்னைக்குத் தீர்வு காணத் தவறும் நிறுவனங்களின் சலுகைகளை இரத்துச் செய்ய வேண்டும் என்றார்.
இவரை சாலை போக்குவரத்து அதிகாரியாக நியமித்தால் போக்கு வரத்து நெரிசல் தீர்ந்துவிடும் .
துவான் இப்ராகிம் அவர்களின் பரிந்துரையை நான் முழுமையாக ஆதரிக்கிறேன். இந்த நாட்டில்தான் இந்த அவலநிலை. நெடுஞ்சாலையை பயன்படுதுவதற்கான காரணங்களில் முக்கியமானது பண மற்றும் நேர விரயத்தை குறைப்பதாகும். பெருநாள் காலங்களில் இவை இரண்டுக்குமே இடமில்லை.இதற்கு மேலாக அபராதம் வேறு. இந்நிலை சாலைப் பயனர்களுக்கு மேலும் சுமையை ஏற்படுத்துகிறது. பணத்தையும் செலுத்தி நெரிசலில் பயணம் செய்யும் பயனர்களுக்கு எந்தவொரு கழிவும் கிடையாது.இதில் யார் புத்திசாளி, யார் அறிவாளி?
அரசாங்கம் இதற்கு சரியான தீர்வை காண வேண்டும்; அதுவரை சாலை கட்டணத்தை உயர்த்த மாட்டோம் என உறுதி கொடுக்க வேண்டும்.