அமெரிக்க   நீதித்துறை   வெளிப்படுத்தியுள்ள   அதிர்ச்சி  தரத்தக்க   தகவல்களை    அடுத்து   பிரதமர்  நஜிப்   அப்துல்   ரசாக்   விடுப்பில்  செல்ல   வேண்டும்  என  மலேசிய    மக்கள்     விரும்புவதாக  எதிரணித்   தலைவர்     டாக்டர்   வான்    அசிசா   வான்   இஸ்மாயில்   கூறினார்.

நஜிப்,   பிரதமராக    இருப்பதால்   அவருடைய    பதவி  முக்கிய    அரசுத்துறைகளை-   சட்டத்துறைத்   தலைவர்   அலுவலகம்,    போலீஸ்,    மலேசிய   ஊழல்-தடுப்பு    ஆணையம்   போன்றவற்றை-  கட்டுப்படுத்தவும்   விருப்பம்போல்   ஆட்டி  வைக்கவும்    இடமளிக்கிறது   என்றாரவர்.

“இந்த   விவகாரத்துக்குப்   பிரதமருடன்   அணுக்கமான    தொடர்பு     உண்டு   என்பதால்      நஜிப்   விடுப்பில்   செல்வதையே   மலேசியர்கள்     விரும்புவதாக    நான்   நம்புகிறேன்.    இந்த    முக்கியமான   விவகாரத்தில்    முழுமையான,   வெளிப்படையான   விசாரணை   நடப்பதைத்   தடுக்க   அதிகாரம்   தவறாகப்   பயன்படுத்தப்பட்டது   என்ற  எண்ணம்   ஏற்படாதிருக்க   அவர்  அவ்வாறு   செய்ய   வேண்டும்”,  என  அசிசா  ஓர்   அறிக்கையில்   கூறினார்.

1எம்டிபி-இலிருந்து   கையாடப்பட்ட   பணத்தைச்    சலவை   செய்யும்   முயற்சியில்  ஈடுபட்ட   அனைத்துலகக்  கும்பல்   ஒன்றுக்குச்   சொந்தமான   ரிம4பில்லியன்  மதிப்புள்ள   சொத்துக்களை   அமெரிக்க  அரசாங்கம்    பறிமுதல்   செய்திருப்பதாக   யுஎஸ்  நீதித்துறை   நேற்றிரவு   அறிவித்ததைக்   கேட்டு   உலகமே   அதிர்ச்சி   அடைந்தது    என    வான்  அசிசா   குறிப்பிட்டார்.