மலேசிய   விமான  நிறுவனத்துக்குச்   சொந்தமான  எம்எச்  370   விமானத்தைத்    தேடும்   பணி  இரண்டாண்டுகளாக   நடைபெற்று    வந்துள்ள    வேளையில்   தவறான   இடத்தில்   தேடி    வருகிறோமோ  என்ற   சந்தேகம்   இப்போது   எழுப்பப்பட்டுள்ளது.

2014  மார்ச்சில்,    239   பயணிகள்     மற்றும்     பணியாளர்களுடன்    கோலாலும்பூரிலிருந்து     பெய்ஜிங்   சென்று    கொண்டிருந்த   எம்எச் 370   திடீரென   மாயமாக  மறைந்தது .  மேற்கு   ஆஸ்திரேலியாவுக்கு    அப்பாலுள்ள    கடலில்    120,000  க்கு   மேற்பட்ட    சதுர   கிலோமீட்டர்   பரப்பில்   அதைத்   தேடும்   பணி  ஈராண்டுகளாக   நடந்து    வருகிறது.

இதுவரை   அப்பகுதியில்   எதுவும்   கண்டுபிடிக்கப்பட   வில்லை.  இன்னும்  மூன்று   மாதங்களில்   தேடும்   பணி  முடிவுக்கு  வரும்.  அதன்  பின்னர்   தேடலைத்   தொடர்வதாக   நிறுத்திக்  கொள்வதா  என்பதை   மலேசியா,   ஆஸ்திரேலியா,  சீனா   ஆகியவை   முடிவு    செய்யும்.   இதற்காக   நாளை   அம்மூன்று   நாடுகளும்   சந்தித்துப்   பேசவுள்ளன.

இதனிடையே,  விமானத்தைத்   தேடும்   பணியில்    ஈடுபட்டுள்ள   குழுவின்   இயக்குனர்   பால்   கென்னடி , “அது  அங்கு  இல்லை   என்றால்,  வேறு  எங்கோ  இருக்கிறது    என்றுதான்   பொருள்”,  என்று  ராய்ட்டரிடம்   தெரிவித்தார்.

கென்னடி,  விமானம்   இப்போது    தேடப்படும்   இடத்திலேயே   கண்ணுக்குத்    தெரியாமல்    மறைந்திருக்கும்   சாத்தியம்    உண்டு  என்பதை    மறுக்கவில்லை.  அதேவேளை,  அது   விழுந்திருக்கலாம்   என்று  கணிக்கப்பட்ட  இடத்தையும்    தாண்டி   அது   சென்றிருக்கலாம்  என்று    அவரும்  அவரது   குழுவினரும்    கூறினர்.