1எம்டிபிமீதான விசாரணையை மறுபடியும் தொடங்க வேண்டும் என்ற பரிந்துரை நிராகரிக்கப்பட்டதால் பொதுக் கணக்குக்குழு (பிஏசி)க் கூட்டத்திலிருந்து அதன் உறுப்பினர் டோனி புவா வெளிநடப்புச் செய்தார்.
அமெரிக்க நீதித் துறை கொண்டுவந்துள்ள வழக்குகளைத் தொடர்ந்து 1எம்டிபி மீதான விசாரணையை மீண்டும் தொடங்க வேண்டும் என்ற பரிந்துரையைத் தாம் முன்வைத்ததாகவும் அதை பிஏசி தலைவர் ஹசான் அரிபின் நிராகரித்தார் எனவும் பெட்டாலிங் ஜெயா உத்தாரா எம்பி கூறினார்.
“அண்மைய நிலவரங்களின் அடிப்படையில் அதன்மீது மீண்டும் விசாரணை செய்யப்பட வேண்டியது அவசியம். இது ஒரு சாதாரண விவகாரம் அல்ல, பிரதமரையே அழைத்து விளக்கம் கேட்க வேண்டும்”,என்று புவா இன்று நாடாளுமன்ற வளாகத்தில் செய்தியாளர்களிடம் கூறினார்.
