சிலாங்கூர்   பிஎன்   சட்டமன்ற   உறுப்பினர்கள்   அவர்களின்   தொகுதிகளுக்காகக்  கொடுக்கப்படும்   நிதி   ஒதுக்கீட்டை  மக்களுக்குச்  செலவிடாமல்    அலுவலகச்  செலவினங்களுக்காகப்  பயன்படுத்திக்   கொள்கிறார்கள்     என   டிஏபியின்   கம்போங்   துங்கு   சட்டமன்ற   உறுப்பினர்   லாவ்   வெங்   சான்   கூறுகிறார்.

“நேற்று   சட்டமன்றத்தில்    சிலாங்கூர்   பட்ஜெட்   2017   மீதான  விவாதங்களை   முடித்து  வைத்துப்    பேசிய    மந்திரி   புசார்,  இந்த  விவகாரத்தை    எழுப்பி    அவர்கள்   அந்த  ஒதுக்கீடுகளை   மக்களின்   நன்மைக்காக     செலவிட  வேண்டும்   என்றார்.

“பிஎன்  சட்டமன்ற   உறுப்பினர்கள்   அனைவருமே    அவர்களுக்கான  ரிம 6,000  மாதாந்திர     ஒதுக்கீட்டை   எடுத்து   ஏழெட்டு  மாதங்களாக   பயன்படுத்திக்   கொண்டிருப்பது   மாநில    அரசுக்குத்   தெரிய   வந்துள்ளது.

“அப்பணம்   2015  முதல்   மாநில   எதிரணி   சட்டமன்ற  உறுப்பினர்   ஒவ்வொருவருக்கும்   கொடுக்கப்படும்   ரிம200,000    ஆண்டு   ஒதுக்கீட்டில்   ஒரு  பகுதியாகும்”,  என்றவர்   ஓர்   அறிக்கையில்    தெரிவித்தார்.

சிலாங்கூர்   அரசு,  ஆளும்  கட்சி   சட்டமன்ற   உறுப்பினர்களுக்கு   அடுத்த   ஆண்டில்   அவர்களின்   தொகுதிச்   செலவுகளுக்காக   ரிம800,000   ஒதுக்கீட்டை  வழங்கும்.  இவ்வாண்டில்   வழங்கப்படும்   தொகை  ரிம700, 000.  பிஎன்   சட்டமன்ற   உறுப்பினர்களுக்கான    ஆண்டு   ஒதுக்கீடு   ரிம200,000தான்.  அதில்  மாற்றமில்லை.

“ரிம200,000  ஒதுக்கீடு   பற்றித்   தங்களுக்குத்   தெரியாது    என்று   அவர்கள்  முறையிட்டிருக்கிறார்கள்.

“அப்பணம்   மக்கள்   நலனுக்காகக்  கொடுக்கப்பட்டது   என்பதை    அவர்கள்   அறியாதிருக்க   முடியாது”,  என   லாவ்  கூறினார்.

2015இல்  அவர்களுக்கு   நிதி    ஒதுக்கீடு   செய்யப்பட்டபோது   அவர்கள்   அதை  நிராகரித்தனர்.  ஆளும்   கட்சி   உறுப்பினர்களுக்கு    கொடுக்கப்படுவதுபோல்   தங்களுக்கும்   ரிம700,000  கொடுக்கப்பட   வேண்டும்    என்று   கோரிக்கை   விடுத்தனர்.

“ஈராண்டுகளுக்குமுன்  புறக்கணித்த   பணத்தை   இப்போது      கமுக்கமாக   பயன்படுத்திக்  கொள்கிறீர்களே   அது   ஏன்?”,  என  லாவ்   வினவினார்.

“ஒதுக்கீட்டை    அவர்கள்   நேர்மையாகப்   பயன்படுத்திக்   கொண்டிருந்தால்   வருமாண்டுகளில்    அரசு   அதை   அதிகரிக்கக்  கூடும்”,  என்றாரவர்.