முன்னாள் முதுகலை பட்டப்படிப்பு மாணவர் சித்தி நூர் ஆயிஷா அடான் பயங்கரவாதம் குறித்துப் பேசும் 12 புத்தகங்களை வைத்திருந்ததற்காக கோலாலும்பூர் உயர் நீதிமன்றம் அவருக்கு ஐந்தாண்டுச் சிறைத் தண்டனை விதித்தது.
“அரசுத்தரப்பு குற்றச்சாட்டை ஐயந்திரிபற நிரூபித்திருக்கிறது. குற்றஞ்சாட்டப்பட்டவர் குற்றவியல் சட்டம் பிரிவு 130ஜேபி (1) (ஏ)-இன்கீழ் குற்றவாளி எனத் தீர்ப்பளிக்கப்படுகிறது”, என்று நீதித்துறை ஆணையர் முகம்மட் ஷரிப் அபு சமட் கூறினார்.
சித்தி ஆயிஷாவின் செயல்கள் “வெறுக்கத்தக்கவை, மோசமானவை” என்று ஷரிப் வருணித்தார். சித்தி ஆயிஷாவின் ஐந்தாண்டுச் சிறைத் தண்டனை அவர் முதன்முதலாகக் கைது செய்யப்பட்ட நாளிலிருந்து தொடங்குவதாகக் கூறிய நீதி ஆணையர், அவரிடமிருந்து கைப்பற்றப்பட்ட புத்தகங்களை அழிக்கும்படியும் உத்தரவிட்டார்.
