மசீசவும் சீனக் கம்யூனிஸ்ட் கட்சியும் (சிபிசி) கையொப்பமிட்டுள்ள ஓர் ஒப்பந்தத்தின் வழி நாட்டிற்குள் கம்யூனிச ஊடுருவல் ஏற்படும் என்று பெர்காசா ஆபத்து சங்கை ஊதுகிறது.

அந்த ஒப்பந்தமும் ஒத்துழைப்பும் நிச்சயமாக கம்யூனிச தத்துவத்தையும் அதன் விரிவாக்கத்தையும் கொண்டுவரும். அது நாட்டிற்கு ஆபத்தானது.

இதுவரையிலான இந்த இரு அமைப்புகளுக்கிடையிலான நெருங்கிய உறவு அரசாங்கத்தின் சந்தேகத்தை எழுப்பியிருக்க வேண்டும்.

“இதை ஏன் அரசாங்கம் அனுமதிக்கிறது?”, என்று பெர்காசாவின் துணைத் தலைவர் சிராஜுடின் எச் சாலே வினவினார்.

மசீசவும் சிபிசியும் செய்து கொண்டுள்ள ஒப்பந்தத்தின்படி கல்வி, பண்பாடு, நிபுணத்துவம், வியூகங்கள். கிராமப்புற மேம்பாடு மற்றும் இதர விவகாரங்களில் ஒத்துழைப்பு நல்க இதில் வகை செய்யப்பட்டுள்ளது.

கடந்த காலத்தில் கம்யூனிஸ்டுகள் இந்த நாட்டிற்கு செய்தவற்றை அரசாங்கம் மறந்து விட்டதா என்று சிராஜுடின் கேட்டார்.

கம்யூனிஸ்ட்களை எதிர்த்துப் போராடி இறந்த பல்லாயிரக்கணக்கான மலாய் வீரர்களையும் அவர்களுடைய குடும்பங்கள் அடைந்த துன்பத்தையும் பிஎன், அம்னோ மற்றும் மலாய் அரசு சார்பற்ற அமைப்புகளும் மறந்து விட்டனவா என்று அவர் கேட்டார்.

எம்சிஎ “கூடவே இருக்கும் எதிரி”. புத்ராஜெயா, இராணுவம், போலீஸ் மற்றும் என்ஜிஒக்கள் எம்சிஎயின் நடவடிக்கைகளை எதிர்க்க வேண்டும் என்று கூறிய அவர், மசீசவின் சிபிசிவுடனான ஒத்துழைப்பை அரசாங்கம் இரத்து செய்ய வேண்டும் என்று பெர்காசா கோருகிறது என்று மேலும் கூறினார்.