தேர்தலை ஆணையத்தை பாரிசான் நேசனலின் அடிமையாக ஆக்கிவிடாதீர் என்று தேர்தல் ஆணையத்தின் முன்னாள் தலைவர் அப்துல் ரஷிட் அப்டுல் ரஹ்மான் தற்போதைய தேர்தல் ஆணையத்தின் தலவர் முகமட் ஹசிம் அப்துல்லாவுக்கு எச்சரிக்கை விடுத்துள்ளார்.

இப்போது பார்டி பிரிபூமி பெர்சத்து மலேசியாவின் உதவித் தலைவரான அப்துல்லா ரஷிட் இன்று இதனை பிகேஆர் அரசியல் பிரிவு உறுப்பினர் ஆர். சிவராசா, அமனா தகவல் பிரிவு தலைவர் காலிட் அப்துல் சாமாட் மற்றும் டிஎபியின் செபுத்தே உதவித் தலைவர் தெரசா கோ ஆகியோருடன் கூட்டாக விடுத்துள்ள ஓர் அறிக்கையில் கூறியுள்ளார்.

14 ஆவது பொதுத் தேர்தலில் பிஎன் ஆட்சிக்குத் திரும்புவதை உறுதி செய்வதற்கு ஆளும் கூட்டணி தேர்தல் ஆணையத்திற்கு அழுத்தம் கொடுப்பதை நாம் அறிவோம்.

ஆனால், தேர்தல் ஆணையம் ஜனநாயக தேர்தல் நடைமுறைக்கு பொறுப்புள்ள ஓர் அமைப்பாகையால், அது மக்களின் நம்பிக்கைக்குப் பாத்திரமானதாக இருக்க வேண்டும் என்று கோரும் அரசமைப்புச் சட்டத்திற்கு முரணாக பாரிசான் நேசனலின் அடிமையாக இருக்க முடியாது, இருக்கக்கூடாது என்று அவர்கள் அந்த அறிக்கையில் கூறுகின்றனர்.

அந்த அறிக்கையில் தற்போதைய தேர்தல் ஆணையத்தின் தலைவர் முகமட் ஹசிம் அவரது பொறுப்பற்ற நடத்தைக்காக சாடப்பட்டுள்ளார்.

பல தேர்தல் சம்பந்தப்பட்ட பிரச்சனைகள் குறித்து விவாதித்து தீர்வு காண்பதற்காக அப்துல் ரஷிட்டின் தலைமையில் ஒரு குழுவைச் சந்திக்குமாறு தற்போதைய தலைவர் ஹசிம்மை அவர்கள் கேட்டுக்கொண்டுள்ளனர்.