பிரதமர் நஜிப் அப்துல் ரசாக் பிரபல வழக்குரைஞர் முகம்மட் ஷாபி அப்துல்லாவுக்கு ரிம9.5 மில்லியன் கொடுத்தார் என்ற குற்றச்சாட்டை விசாரிக்க சரவாக் ரிப்போர்ட் செய்தியாசிரியர் கிளேய்ர் ரியுகாசல்- பிரவுனின் உதவி தேவையில்லை என்கிறார் வழக்குரைஞர் மன்ற முன்னாள் தலைவர் அம்பிகா ஸ்ரீநிவாசன்.
இது சிக்கலற்ற வழக்கு, எளிதாக தீர்வு கண்டு விடலாம் என்றாரவர்.
அவ்விவகாரத்தில் லண்டனில் உள்ள ரியுகாசல் மலேசியாவுக்கு வந்து மலேசிய போலீசுக்கு உதவினால் நன்றாக இருக்கும் என்று இன்ஸ்பெக்டர்- ஜெனரல் அப் போலீஸ் காலிட் அபு பக்கார் கூறியிருப்பது குறித்துக் கருத்துரைத்தபோது அம்பிகா அவ்வாறு கூறினார்.
“ஐஜிபி ஒப்புக்காக சொன்னதுபோல் தெரிகிறது. அவருக்கு (ரியுகாசல்) இண்டர்போல் சிவப்பு அறிக்கை (கைது ஆணை) காத்திருக்கிறது. இங்கு கால் வைத்ததுமே கைது செய்யப்படலாம்”, என அம்பிகா மலேசியாகினியிடம் தெரிவித்தார்.
“ஐஜிபி-இன் கூற்று ஓர் எளிய வழக்குக்குத் தீர்வுகாண மலேசிய போலிசுக்கு உதவி தேவை என்று நினைக்க வைத்து அவர்களைத் திறமையற்றவர்களாகக் காண்பிக்கிறது. ஆனால், அது உண்மை அல்ல”, என்றாரவர்.
குற்றம் சாட்டப்பட்டவர்கள் எல்லாருமே மலேசியாவில் உள்ளனர். சொல்லப்பட்ட வங்கிக் கணக்குகளும் இங்குதான் உள்ளன.
“போலீஸ் விசாரணையைத் தொடங்குவதற்கு இவையே போதுமான விவரங்கள்.
“பின்னர் ஏன் தயக்கம்? தகவல் சொன்னவர்களைச் சாடாமல் முறைகேடுகள் குறித்து தகவல் அளிப்போருக்கு ஐஜிபிக்கு நன்றி சொல்ல வேண்டும்”, என அம்பிகா கூறினார்.
கடந்த வாரம் சரவாக் ரிப்போர்ட் ஷாவிக்குக் கொடுக்கப்பட்ட பணம் இரண்டு பகுதிகளாகக் கொடுக்கப்பட்டது என்று கூறியிருந்தது.
அன்வார் இப்ராகிமின் இரண்டாவது குதப்புணர்ச்சி வழக்கில் ஷாபி அரசுத்தரப்பு தலைமை வழக்குரைஞராக இருந்தார் என்பது குறிப்பிடத்தக்கது.
சரவாக் ரிபோர்டில் வெளிவந்த அச்செய்தியைச் சுட்டிக்காட்டி அன்வார் இப்ராகிமைக் குற்றவாளிக்க அரசியல் சதி நடந்திருப்பதாக எதிரணி கூறி வருகிறது.
சரவாக் ரிப்போர்டின் குற்றச்சாட்டை மலேசியாகினியால் உறுதிப்படுத்திக்கொள்ள முடியவில்லை.
பலமுறை தொடர்புகொண்டும் ஷாபி இவ்விவகாரம் தொடர்பில் கருத்துரைக்கவில்லை.
அம்மா அம்பிகா அவர்களே நீங்கள் என்ன சொன்னாலும் இந்த அரைவேக்காட்டுக்கும் ஒன்றும் ஏறாது– எல்லாமே அவன்களின் கையில் இருப்பதால் என்ன வேண்டுமானாலும் சொல்வான் கள் செய்வான் கள் – இவன்களுக்கு லீ குவான் இயூ போல் நாடு முன்னேற வேண்டும் என்று எண்ணம் இருந்தால் எல்லாமே ஒழுங்காக நடக்கும் – இந்த கை நக்கிகளுக்கு நக்கியே பழக்கம்- வேறு என்ன செய்ய முடியும்?
நான் பலமுறை கூறியது போல , நன்கு படித்த, சட்டம் தெரிந்த, மதம், இனம் பார்க்காத, இலஞ்சம் பெறாத, நேர்மையான காவல்படை தலைவர் இருந்தாலே நாடு முன்னேறும், உலக அரங்கில் நற்பெயர் பெற்று வளம் வரும், இல்லையேல் நாடு பின்னோக்கி செல்லும்.
விமான நிலைய பகுதியில் வட கொரியர் கொலை விவகாரத்தில் சந்தேகிக்கபடும் நபர் வட கொரிய தூதரகத்தில்தான் உள்ளார், 5 நாட்கள் என்ன, 5 வருடமானாலும் காத்திருந்து கைது செய்து விசாரித்தே தீருவோம் என “இம்யூனிட்டி” என்பதற்கு அர்த்தம் புரியாமல் வீராப்பு பேசிவிட்டு,
சந்தேகிக்கபட்ட நபரை தனது போலீஸ் படையின் சகல வசதிகளோடு பாதுக்காப்பாக அவரது தாயகத்திற்கு அனுப்பிவிட்டு,
இப்போது தங்கள் சந்தேகிக்கபடும் நபரை வட கொரியா மலேசியாவிற்கு அனுப்பி தங்களது விசாரணைக்கு உதவ வேண்டும் என வட கொரியாவிடம் மண்டியிட்டு மன்றாடி கொண்டிருக்கும் ஐஜிபி-யை,
சரவாக் ரிபோர்ட் ஆசிரியர் உதவி தேவையில்லை, எளிய வழக்குன்னு சொல்லி ஐஜிபி-யை மென்மேலும் குழப்பி விட்டீர்கள்.
“என்னமா இப்படி பண்றீங்களமா” என ஐஜிபி-யை கோலாலம்பூர் தெருவில் புலம்பும் நிலைமைக்கு கொண்டு வந்து விடுவீர்கள் போலிருக்கே.