டிஏபி அதன் மத்திய செயலவைத் தேர்தலை வேண்டுமென்றே தாமதப்படுத்துவதாக அபாண்டமாக பழி சுமத்துகிறார்கள் என்று கூறும் அக்கட்சியின் தேசிய சட்டப் பிரிவுத் தலைவர் கோபிந்த் சிங் டியோ, சங்கப் பதிவகத்திடமிருந்து அதிகாரப்பூர்வ அறிவிக்கை எதுவும் இன்னும் கிடைக்கப் பெறவில்லை என்றார்.
“இன்று காலை 10 மணிவரை எதுவும் எங்களுக்கு வந்துசேரவில்லை.
“ஆர்ஓஎஸ் கடந்த வெள்ளிக்கிழமை பத்திரிகை அறிக்கை ஒன்றை வெளியிட்டிருந்தது. அதன்மீது வார இறுதி தொடங்கி இதுவரை பொதுவில் விவாதிக்கப்படுகிறது”, என பூச்சோங் எம்பியுமான கோபிந்த் இன்று ஓர் அறிக்கையில் கூறினார்.
மறுதேர்தல் நடத்துவதை டிஏபி தாமதப்படுத்துவதாகக் கூறப்படுவதை மறுத்த அவர், ஆர்ஓஎஸ்தான் கட்சியுடன் தொடர்புகொண்டு சொல்ல வேண்டியதைச் சொல்லாமல் தாமதப்படுத்தி வருகிறது என்றார்.
ஆர்ஓஎஸ் தாமதப்படுத்துவது டிஏபியின் 14வது பொதுத் தேர்தலுக்கான ஆயத்தப்பணிகளையும் பாதிக்கும் என்பதை கோபிந்த் சுட்டிக்காட்டினார்.
