வாரக்  கடைசியில்   சரவாக்கில்   ஒரு  கூட்டத்தில்   பேசியபோது   பிரதமர்   நஜிப்   அப்துல்   ரசாக்  குறித்தும்   அவரின்  தந்தையார்    அப்துல்   ரசாக்   பற்றியும்  கூறிய   கருத்துகளுக்காக   டாக்டர்   மகாதிர்   முகம்மட்    ஒரு  வாரத்துக்குள்  மன்னிப்பு   கேட்க   வேண்டும்   என்று   அம்னோ   அடிநிலை  உறுப்பினர்களின்   இயக்கம்   கோரிக்கை   விடுத்துள்ளது.

அவ்வாறு   செய்யவில்லை  என்றால்   அவருக்கு   எதிராக     பழித்துரைத்தார்,   கிளர்ச்சியைத்  தூண்டிவிடுகிறார்   என்று   போலீசில்   புகார்    செய்யப்படும்    என்று   அவ்வியக்கத்தின்   தலைவர்   சுல்கர்னைன்  மஹ்டார்   கூறினார்.

மகாதிர்   தம்  உரையில்   சரவாக்   அதன்  உரிமைகளை   இழந்ததற்கு   நஜிப்பும்   இரண்டாவது    பிரதமரான   அவரின்  தந்தையும்தான்  காரணம்   என்று   குறிப்பிட்டதற்கு  எதிர்வினையாக    அவ்வியக்கம்   இவ்வாறு   கூறிற்று.

மகாதிரிடம்    அவரது   குற்றச்சாட்டை   நிருபிக்க   ஆதாரங்கள்   உண்டா  என்று  சவால்   விடுத்த     சுல்கர்னைன்,   1963 மலேசிய   உடன்பாட்டின்    அடிப்படையில்   சாபா,  சரவாக்  மக்களின்   உரிமைகளை   ஆராய  ஒரு  சிறப்புக்குழுவை   அமைக்க   வேண்டும்   என்று   பரிந்துரைத்த   ஒரே   பிரதமர்   நஜிப்தான்   என்பதையும்  சுட்டிக்காட்டினார்.
“நஜிப் , சாபா,  சரவாக்கைச்  சேர்ந்தவர்கள்  11பேரை  முழு   அமைச்சர்களாகவும்  ஒன்பது  பேரைத்  துணை   அமைச்சர்களாகவும்   நியமித்துள்ளார். மகாதிர்  பிரதமராக  இருந்தபோது  இப்படி   நிகழ்ந்ததில்லை”,  என்றவர்  ஓர்   அறிக்கையில்   கூறினார்.