முன்னாள் டிஏபி சட்டமன்ற பிரதிநிதி ஒருவர் மக்கள் மாற்றுக் கட்சி(பிஏபி)க்குத் தாவியுள்ளார். அவர்தான் டான் பெங் ஹுவாட். அவர் இப்போது அக்கட்சியின் பினாங்கு மாநிலத் தொடர்புக்குழுத் தலைவர்.
இன்று ஜாவியில் செய்தியாளர்களிடம் பேசிய அவர், டிஏபி இப்போது கட்சிக் கொள்கைகளுக்கு முன்னுரிமை அளிப்பதில்லை என்றார்.
“கட்சி மூத்த தலைவர்களை மறந்து கிட்டத்தட்ட ஒரு குடும்பச் சொத்தாக மாறிவிட்டது”, என முன்னாள் ஜாவ் சட்டமன்ற உறுப்பினரான அவர் கூறினார்.
“தலைவர்கள் ஆணவம், திமிர், செருக்கு பிடித்து அலைகிறார்கள்.
“பினாங்கில் 10 ஆண்டுகள் ஆட்சி நடத்திய பின்னர் இப்படிப்பட்ட போக்கு முற்றிப்போயுள்ளது”, என்று கூறிய டான், 2013 பொதுத் தேர்தலில் பிகேஆர் 10 இடங்களை வென்றது என்பதை மறந்து அதன் பிரதிநிதி ஒருவரைக்கூட டிஏபி அவமதித்து விட்டது என்றார்.
டிஏபியுடன் எல்லா தொடர்புகளையும் துண்டித்தக் கொண்டதன் அடையாளமாகக் கட்சி உறுப்பினர் அட்டையைத் துண்டுத் துண்டாக வெட்டி எரிந்தார். அத்துடன் 100 உறுப்பினர் பாரங்களையும் அவர் பிஏபி தலைவர் சுல்கிப்ளி முகம்மட் நூரிடமும் பிஏபி துணைத் தலைவர் ரஹ்மாட் இஷாக்கிடமும் கொடுத்தார்.
பிஏபி, டிஏபியின் முன்னாள் உதவித் தலைவர் சுல்கிப்ளி முகம்மட் நூர் அமைத்த ஒரு கட்சி. 25 ஆண்டுகள் அக்கட்சியில் இருந்த சுல்கிப்ளி இறுதியில் அதிருப்தியுற்று அதிலிருந்து வெளியேறினார். அவரைப்போன்று டிஏபியிடம் அதிருப்தியுற்றிருந்த வேறு சிலரும் அவருடன் சேர்ந்துகொண்டனர்.
