பூலாய் நாடாளுமன்ற உறுப்பினர் நூர் ஜஸ்லான், சிங்கப்பூரின் சிந்தனைக் களமான Iseas-Yusof Ishak கழகம் கூறியிருப்பதுபோல் அந்த நாடாளுமன்றத் தொகுதி அவ்வளவு எளிதில் எதிரணியிடம் வீழ்ந்து விடாது என்கிறார்.
14வது பொதுத் தேர்தல்மீது அக்கழகம் செய்த ஆய்வு முறையான ஆய்வல்ல. அது உண்மை நிலவரங்களை அடிப்படையாகக் கொள்ளவில்லை என்றாரவர்.
“அது குறையுடைய ஆய்வு. அத்தொகுதியின் எல்லா அம்சங்களையும் அது கருத்தில் கொள்ளவில்லை. பூலாய் ஒரு நகர்ப்புற தொகுதி என்பதால் அது வீழ்ந்து விடும் என்கிறார்கள். ஆனால், அது அவ்வளவு எளிதல்ல.
“2013-இல் கிட் சியாங் சுனாமியால் (கிட் சியாங் ஜோகூரில் போட்டியிட்டதால்) பூலாய் வீழ்ச்சி காணும் என்றுதான் கருதப்பட்டது.
“கிட் சியாங் கேளாங் பாத்தாவில் போட்டியிட்டு வென்றார். ஆனால், ‘சுனாமி’ பூலாயைத் தாக்கவில்லை”, என நூர் ஜஸ்லான் இன்று ஜோகூரில் தெரிவித்தார்.
ஜிஇ14-இல் ஜோகூரில் பாரிசான் நேசனல்தான் பெரும்பாலான இடங்களை வெல்லும் ஆனால் பூலாய், தெப்ராவ், பாசிர் கூடாங் போன்ற நாடாளுமன்றத் தொகுதிகளில் எதிரணியினர் வெற்றி பெறுவார்கள் என்று Iseas-Yusof Ishak கழகம் தெரிவித்திருந்தது குறித்து அவர் கருத்துரைத்தார்.
