கெராக்கான்    தலைவர்  மா  சியு  கியோங்,      தங்கள்  கட்சி  14வது   பொதுத்    தேர்தலில்    பினாங்கில்  கூடுதல்  இடங்களைக்  கைப்பற்றும்   என்று   நம்புகிறார்.

“பினாங்கு  மாநில   அரசைத்   தட்டிக்  கேட்க  பினாங்கு   மக்கள்   ஒரு  சில   கெராக்கான்  வேட்பாளர்களைத்    தேர்ந்தெடுப்பார்கள்   என்ற   நம்பிக்கை  உண்டு”,  என்றார்.

“பினாங்கில்  டிஏபியால்  வழிநடத்தப்படும்   அரசுதான்   ஆட்சி  செய்யப்போகிறது.  ஏனென்றால்   கடந்த   முறை   19  இடங்களில்  போட்டியிட்ட   டிஏபி   எல்லா  இடங்களையும்   வென்றது.

“இதற்குமுன்     அவர்கள்   தோற்றதில்லை.  அதனால்   அவர்களுக்குத்   திமிர்   வந்து  விட்டது . இம்முறை  பினாங்கில்   சாதிப்போம்   என்ற  நம்பிக்கை   வந்துள்ளது”,  என  இன்று  செராஸில்   கெராக்கான்   தலைமையத்தில்    செய்தியாளர்களிடம்   அவர்   தெரிவித்தார்.

பினாங்கைப்    பல   ஆண்டுகளாக   ஆட்சி  செய்த  கெராக்கான்   2008  பொதுத்  தேர்தலில்   டிஏபி-இடம்  தோற்றது.

14வது  பொதுத்   தேர்தலில்   சட்டமன்றத்துக்கும்  நாடாளுமன்றத்துக்கும்   45  இடங்களில்   போட்டியிடப்போவதாக   மா  கூறினார்.

அதன்  வேட்பாளர்கள்  பல  இனங்களையும்    சேர்ந்தவர்கள். 60  விழுக்காட்டினர்  புதுமுகங்கள்   என்றாரவர்.

கடந்த  காலத்தில்  மசீசவுடன்    கருத்துவேறுபாடுகளைக்   கொண்டிருந்ததாகவும்   14வது  பொதுத்  தேர்தலில்   கருத்துவேறுபாடுகளையெல்லாம்   புதைத்துவிட்டு   இரண்டும்   ஒத்துழைக்க  முடிவு   செய்துள்ளதாகவும்   அவர்  கூறினார்.