எதிர்வரும் 14வது பொதுத் தேர்தலில் பிகேஆர் உதவித் தலைவர் நூருல் இஸ்ஸா அன்வார் பெர்மாத்தாங் பாவிலும் அவரின் தாயாரும் பிகேஆர் தலைவருமான டாக்டர் வான் அசிசா வான் இஸ்மாயில் கிள்ளான் பள்ளத்தாக்கிலும் போட்டியிடுவார்கள்.
ஆங்கில நாளேடான த ஸ்டார் கட்சித் தலைமைச் செயலாளர் சைபுடின் நசுத்தியோனை மேற்கோள்காட்டி இதைத் தெரிவித்துள்ளது.
“அதன் தொடர்பில் விரைவில் அறிவிப்பு வரும்”, என்றவர் சொன்னார்.
கடந்த டிசம்பரிலேயே மலேசியாகினி, நூருல் இஸ்ஸா பெர்மாத்தாங் பாவிலும் வான் அசிசா பாண்டானில் அல்லது பண்டார் துன் அப்துல் ரசாக்கில் போட்டியிடுவார்கள் என்று கூறியிருந்தது.
கட்சி வட்டாரங்கள் பல, 2013 பொதுத் தேர்தலுக்குப் பின்னர் போலீஸ் படையினர் 6598 பேர் புதிய வாக்காளர்களாக லெம்பா பந்தாய் தொகுதிக்கு மாற்றப்பட்டிருக்கிறார்கள் என்பதால் நூருல் இஸ்ஸா அங்கு போட்டியிடுவார் என்று எதிர்பார்ப்பதற்கில்லை என்று மலேசியாகினியிடம் தெரிவித்திருந்தன.
நூருல் இஸ்ஸா வேறு தொகுதிக்கு மாறிச் சென்றால் அந்தத் தொகுதியில் அவரின் முன்னாள் அரசியல் செயலாளரான பிகேஆரின் தொடர்பு இயக்குனர் பாஹ்மி பாட்சில் களமிறக்கப்படலாம்.
நூருல், பாண்டானில் போட்டியிடலாம் என்றும் ஒரு வதந்தி உண்டு. அதன் நடப்பு எம்பி ரபிசி ரம்லி பல வழக்குகளை எதிர்நோக்குவதால் போட்டியிடமாட்டார் என்று எதிர்பார்க்கப்படுகிறது.
ஆனால், அதை “வெறும் வதந்தி” என்று நூருல் இஸ்ஸா ஒதுக்கித் தள்ளினார்.
