தெங்கு அட்னான் தெங்கு மன்சோருக்கு 12 மாதச் சிறைத்தண்டனையும், RM2 மில்லியன் ஊழல் குற்றச்சாட்டில் RM2 மில்லியன் தண்டமும் விதிக்கப்பட்டது.
இன்று காலை, கோலாலம்பூர் உயர்நீதிமன்ற நீதிபதி மொஹமட் ஸைய்னி மஸ்லான், திறந்த நீதிமன்ற நடவடிக்கைகளின் போது இந்தத் தீர்பை அறிவித்தார்.
குற்றவாளி என நீதிபதி நிரூபித்தபோது, குற்றவாளி கூண்டிலிருந்து தெங்கு அட்னான் பார்த்தார்.
இருப்பினும், மேல்முறையீட்டு நீதிமன்றத்தில், மேல்முறையீடு நிலுவையில் உள்ளதால் தண்டனை நிறைவேற்றத்தை ஒத்திவைப்பதற்கான பாதுகாப்பு விண்ணப்பத்தை நீதிபதி அனுமதித்தார்.
முன்னதாக, பாதுகாப்பு ஆலோசகர் தான் ஹோக் சுவான், மென்மையான தண்டனைக்கு விண்ணப்பிக்கும் போது, தனது வாடிக்கையாளர் முதல்முறை குற்றவாளி என்றும், குற்றம் மிகவும் கொடூரமானது அல்ல என்றும் கூறினார்.
“எனது வாடிக்கையாளர் நாட்டிற்குப் பெரும் பங்களித்துள்ளார், மேலும் அமைச்சரவையிலும் நாடாளுமன்றத்திலும் 17 ஆண்டுகள் பணியாற்றியுள்ளார்.
“அவர் சிறைத்தண்டனை அனுபவிக்கக்கூடாது, எனது வாடிக்கையாளருக்கு அபராதம் மட்டுமே விதிக்கப்பட வேண்டும் என்று நான் கோரிக்கை வைக்கிறேன்.
“நாடாளுமன்ற உறுப்பினராக, அவர் தனது தகுதியைத் தொடர்ந்து பராமரிக்க நீதிமன்றம் RM2,000-க்கும் குறைவான தண்டம் விதிக்க வேண்டும் என்று நான் கேட்டுக்கொள்கிறேன்,” என்று அவர் கூறினார்.
மக்களவையின் மெலிதான பெரும்பான்மையை நீதிமன்றம் பரிசீலிக்க வேண்டும் என்றும், குற்றம் சாட்டப்பட்டவர் நாடாளுமன்ற உறுப்பினர் என்று தகுதி நீக்கம் செய்யப்பட்டால், தற்போதைய அரசு பாதிக்கப்படும் என்றும் தான் கூறினார்.
இதனையடுத்து, “இந்த நாட்டின் அரசியல் வளர்ச்சியில் நான் அக்கறை கொள்ள வேண்டுமா?” என்று நீதிபதி மொஹமட் ஜெய்னி கேள்வி எழுப்பினார்.
ஒரு குற்றத்தைக் கண்டுபிடித்து, தண்டனை விதிக்க நீதிமன்றம் கவலைப்படக்கூடாது, ஆனால் நீதிமன்றத்தின் முடிவு ஒரு விளைவை ஏற்படுத்தும் என்பதை பரிசீலிக்க வேண்டும் என்று தான் பதிலளித்தார்.
அதுமட்டுமின்றி, தெங்கு அட்னனுக்கு உயர் இரத்த அழுத்தம், கொழுப்பு மற்றும் நுரையீரல் பிரச்சினைகள் உள்ளிட்ட பல உடல்நலப் பிரச்சினைகள் இருப்பதாகவும் வழக்கறிஞர் கூறினார்
அரசு துணை வழக்கறிஞர் ஜூலியா இப்ராஹிம், தெங்கு அட்னான் நாடாளுமன்ற உறுப்பினராகத் தகுதி நீக்கம் செய்யப்படக்கூடாது என்பதற்காக RM2,000-க்கும் குறைவாக அபராதம் விதிக்கப்பட வேண்டும் என்பது நியாயமான தீர்ப்பு அல்ல என்று வாதிட்டார்.
“குற்றச்சாட்டில் உள்ள தொகை RM2 மில்லியன், முன்னதாக குற்றம் சாட்டப்பட்டவர் RM2 மில்லியன் தனக்கு ‘பாக்கெட் பணம்’ என்று கூறியிருந்தார்.
“எம்.பி. தகுதி நீக்கம் செய்யப்படுவதைத் தவிர்ப்பதற்கு RM2,000 தண்டம் என்பதை ஏற்றுக்கொள்ள முடியாது. ஒவ்வொரு முறை தேர்தல் நடைபெறும் போதும், ஒரு மாற்றம் இருக்கும். குற்றம் சாட்டப்பட்டவர் எம்.பி. ஆகாவிட்டால், மற்றவர்கள் அப்பதவியை வகிக்கவும் சமூகத்திற்குச் சேவை செய்யவும் வாய்ப்பு கிடைக்கும்,” என்று அவர் கூறினார்.
வழக்கு விசாரணைக்குப் பொருத்தமான தண்டம் எவ்வளவு என்று நீதிபதி கேட்டபோது, ஜூலியா கூறினார்: “குற்றம் சாட்டப்பட்ட தொகையை விட குறைவாக இல்லை”.
முன்னதாக, டிசம்பர் 7-ம் தேதி, கோலாலம்பூர் உயர்நீதிமன்றம், மற்றொரு RM1 மில்லியன் ஊழல் வழக்கில் தெங்கு அட்னனுக்கு விடுதலையை (டி.என்.ஏ.ஏ) வழங்கியது.
இன்றைய முடிவு தொடர்பான குற்றச்சாட்டுகளின்படி, ஓர் அரசு ஊழியரான, தெங்கு அட்னான், அமைச்சர் என்ற முறையில், ஏ.கே.எஸ்.பி. இயக்குநர் சாய் கின் கோங் என்ற தொழிலதிபரிடமிருந்து RM2 மில்லியனைப் பெற்றார் என்று அவர் மீது குற்றம் சாட்டப்பட்டது.
ஏ.கே.எஸ்.பியின், ஹொங் லியோங் இஸ்லாமிய வங்கியின் காசோலை மூலம் தெங்கு அட்னன் இந்த இலஞ்சத்தைப் பெற்றார்.
ஜூன் 14, 2016 அன்று, கோலாலம்பூரில் உள்ள சிஐஎம்பி வங்கி, டாமான்சாரா நகர மையக் கிளையில், அந்தப் புத்ராஜெயா எம்.பி. அக்குற்றத்தைப் புரிந்தார் என குற்றவியல் தண்டனைச் சட்டத்தின் பிரிவு 165-ன் கீழ் அவர் மீது குற்றஞ்சாட்டப்பட்டது.
