கோவிட் -19 தொற்றுக்கு எதிராக, தேசியக் கூட்டணி (பி.என்.) அரசாங்கம் தோல்வி அடைந்ததற்கான ஆதாரமாக பல வாதங்களைப் பட்டியலிடலாம். எனவே, அமைச்சரவையின் தலைவர் என்ற வகையில் பிரதமர் முஹைதீன் யாசின் இதற்குப் பொறுப்பேற்க வேண்டும்.

இரமலான் மாதத்தில், ஒரு முஸ்லீம் பிரதமரை இராஜினாமா செய்யக் கேட்பது அழகான கோரிக்கை அல்ல, ஆனால் அவர்தான் இந்நிலைக்குக் காரணம்.

ஆனால், இஸ்லாமிய வரலாற்றில், இரமலான் மாதத்தில் போர்கள் நடந்துள்ளன, அதில் தோல்வியுற்றது நிரூபிக்கப்பட்டால், படை ‘தளபதி’யைப் பின்வாங்கக் கோருவதில் தவறில்லை.

கோவிட் -19 தொற்றுக்கு எதிரான போர் தொடங்கப்பட்டு ஒரு வருடத்திற்கும் மேலாகிவிட்டது. வெற்றி பெறும் முயற்சி ஒருபுறம் இருக்க, இறப்பு எண்ணிக்கைகள் அதிகரித்து வருகிறது.

ஏப்ரல் 18-ஆம் தேதி நிலவரப்படி, கோவிட் -19 விளைவாக மொத்தம் 1,378 பேர் இறந்துள்ளனர். இந்த எண்ணிக்கை வெறும் புள்ளிவிவரங்கள் அல்ல, மனிதர்கள்.

நேற்று, ஏப்ரல் 22 நிலவரப்படி, கோவிட் -19 நேர்மறை வழக்குகளின் எண்ணிக்கை 384,688 ஆகும், இதில் 2,875 புதிய வழக்குகள் உள்ளன. இந்தப் புள்ளிவிவரங்கள் அனைத்தும் மனிதர்கள், நம் மக்கள், நம் குடிமக்கள், வெறும் தரவுகள் அல்ல.

சுகாதார அமைச்சர் மட்டுமல்ல, முழு பி.என். அமைச்சரவையும் இதற்குப் பொறுப்பேற்க வேண்டும். அமைச்சர்களின் கூட்டுப் பொறுப்பை, இறுதியாக முஹைதீன் பிரதமராக ஏற்க வேண்டும்.

அவசரகாலப் பிரகடனத்திற்குக், கோவிட் -19 தொற்றுநோயை எதிர்த்து போராடுவதைத் தவிர வேறு எந்த நோக்கமும் இல்லை என்று முஹைதீன் முன்பு கூறவில்லையா?

கடந்த பிப்ரவரி முதல் அவசரகால நிலை அறிவிக்கப்பட்டு, நாடாளுமன்றம் இடைநீக்கம் செய்யப்பட்ட போதிலும், முஹைதின் தலைமையிலான பிஎன் அரசாங்கம் கோவிட் -19 கொண்டு வந்த அலைகளை எதிர்த்துப் போராடத் தவறிவிட்டது.

RM300 பில்லியனுக்கும் அதிகமான தேசிய வரவுசெலவு திட்டம் நாடாளுமன்றத்தால் அங்கீகரிக்கப்பட்டிருந்தாலும், RM70 பில்லியனுக்கும் அதிகமான தூண்டுதல் தொகுப்புகள் அறிவிக்கப்பட்டாலும், துரதிர்ஷ்டவசமாக முஹைதீன் தலைமையிலான அரசாங்கம் கோவிட் -19 தொற்றை எதிர்த்து போராடுவதில் தவறிவிட்டது.

ஓர் அமைச்சருக்கு உதவ இரண்டு துணையமைச்சர்கள்

சுமார் 330 மில்லியன் மக்கள்தொகை கொண்ட அமெரிக்கா, 50 விழுக்காட்டிற்கும் அதிகமான பெரியவர்களுக்குத் தடுப்பூசி போட்டுள்ளது.

இருப்பினும், மலேசியாவில் ஏப்ரல் 18 நிலவரப்படி, 32 மில்லியன் மக்களில் 1,135,015 பேருக்கு மட்டுமே தடுப்பூசி போடப்பட்டுள்ளது. அந்த எண்ணிக்கை மொத்த மக்கள் தொகையில் 2 விழுக்காட்டிற்கும் குறைவாகவே உள்ளது.

மலேசியாவில் தடுப்பூசி திட்டம் ஏன் மெதுவாக நகர்கிறது? மலேசிய அமைச்சரவையில் இவ்வளவு அமைச்சர்கள் மற்றும் துணை அமைச்சர்கள் இருக்கும்போது என்ன பிரச்சினை?

சுகாதார அமைச்சருக்கு உதவ இரண்டு துணையமைச்சர்கள் உள்ளனர். தவிர, கோவிட் -19 நேர்வுகளைக் கையாள, சிறப்பு செயல் அமைச்சரும் இருக்கிறார்.

மேலும், தடுப்பூசி கொள்முதல் மற்றும் செயல்திட்டத் தலைவராக அறிவியல், தொழில்நுட்பம் மற்றும் புத்தாக்க அமைச்சரான, ரெம்பாவ் எம்.பி. உள்ளார்.

இத்தகைய சூழ்நிலைகளில், தடுப்பூசி திட்டம் ஏன் மெதுவாக இயங்குகிறது, ஒரு நத்தையின் நகர்வைவிட மிக மெதுவாக.

ஒதுக்கீடுகள் உள்ளன, பல அமைச்சர்கள் இருக்கிறார்கள், ஆனால் மிகக் குறைந்த எண்ணிக்கையிலேயே இதுவரை தடுப்பூசி போடப்பட்டுள்ளது. இது ஏன்?

எனவே, கோவிட் -19 தொற்றுக்கு எதிரான இந்தப் போரில், பி.என். அரசாங்கம் தோல்வியடைந்துள்ளது, முஹைதீனின் அமைச்சரவைத் தோல்வியடைந்துள்ளது. நேற்றைய நிலவரப்படி, 1,400-க்கும் மேற்பட்டவர்களைக் கொன்ற கோவிட் -19 தொற்றுக்கு எதிரான போரில், முஹைதீன் தளபதியாகப் பொறுப்பேற்றுள்ளார்.

இன்னும் அதிகமான மக்கள் இறந்த பிறகுதான், தோல்வியுற்ற பிரதமர் இராஜினாமா செய்வார் என்றால், அதுவரை காத்திருக்க நாங்கள் விரும்பவில்லை.

எனவே, பாசீர் கூடாங் எம்.பி.யான நான், முஹைதீனை இப்போதே இராஜினாமா செய்யுமாறு வலியுறுத்துகிறேன்.

____________________________________________________________________________________

ஹசான் அப்துல் கரீம், ஜொகூர், பாசீர் கூடாங் நாடாளுமன்ற உறுப்பினர்.