நாடாளுமன்றம் l நாட்டின் வரலாற்றில் மிகப்பெரிய பட்ஜெட்டாக இருக்கும் 2022 பட்ஜெட்டை மறுபரிசீலனை செய்யுமாறு முன்னாள் பிரதமர் துன் டாக்டர் மகாதீர் முகமட் அரசாங்கத்திடம் கேட்டுக்கொண்டுள்ளார்.

எதிர்காலத்தில் நாட்டின் கடன் சுமை இலகுவாக இருக்கும் வகையில், வரவு செலவுத் திட்டத்தில் பல ஒதுக்கீடுகள் குறைக்கப்படலாம் என்றார் அவர்.

“நாடு எதிர்கொள்ளும் நெருக்கடியைச் சமாளிக்க நிறைய பணம் தேவை என்பதை நான் அறிவேன், ஆனால் அதே நேரத்தில், அரசாங்கச் செலவினங்களைக் குறைக்கவும், கடன் சுமை எதிர்காலச் சந்ததியினரின் முதுகில் ஏற்றப்படாமல் இருக்கவும் அரசாங்கம் கவனமாக இருக்க வேண்டும்,” என்று இன்று, மக்களவையில் 2022 வழங்கல் மசோதா விவாதத்தின் போது அவர் கூறினார்.

புதிய தொழில்நுட்பங்கள் மற்றும் தனியார்மயமாக்கலைப் பயன்படுத்துவதன் மூலம் கல்வி, விவசாயம் மற்றும் தொலைத்தொடர்பு ஆகிய துறைகளில் அரசாங்க செலவினங்களைக் குறைக்க முடியும் என்று அந்த லங்காவி எம்.பி. சொன்னார்.

தொலைத்தொடர்புத் துறை தனியார்மயமாக்கப்பட்ட பிறகு, வாடிக்கையாளர்களுக்கு வழங்குவதற்கு பில்லியன் கணக்கான ரிங்கிட் தேவைப்படும் சமீபத்திய தொழில்நுட்பத்தை அரசாங்கம் கையகப்படுத்தியது என்று டாக்டர் மகாதீர் உதாரணம் காட்டினார்.

“இந்தச் சேவையில் அரசாங்கம் ஈடுபட வேண்டிய அவசியம் என்ன. நிச்சயமாக, நீண்ட காலமாக நாட்டில் தகவல் தொடர்பு அமைப்புகளை வழங்கி வரும் தொலைத்தொடர்பு நிறுவனத்திடம் விட்டுவிடுவது நல்லது,” என்று அவர் கூறினார்.

செம்போர்னா நாடாளுமன்ற உறுப்பினர், முகமட் ஷாஃபி அப்டால், குறிப்பிட்ட விலையைத் தாண்டிய அத்தியாவசியமற்ற ஆடம்பரப் பொருட்கள் மற்றும் சேவைகளின் ஒவ்வொரு வாங்குதலுக்கும் ஆடம்பர வரியை அமல்படுத்துவது குறித்து அரசாங்கம் பரிசீலிக்க வேண்டும் என்று பரிந்துரைத்தார்.

சூப்பர் கார்கள், படகுகள், தனியார் ஜெட் விமானங்கள், அதிக மதிப்புள்ள நகைகள் மற்றும் பிற ஆடம்பரப் பொருட்கள் போன்ற சொகுசுப் பொருட்களுக்கு வரி விதிக்கப்படலாம்,” என்றார் அவர்.

இது பாதிக்கப்பட்ட அரசாங்கத்தின் வருவாயை அதிகரிக்க உதவுவதோடு, குறைந்த மற்றும் அதிக வருமானம் பெறும் பிரிவினருக்கு இடையிலான பொருளாதார இடைவெளியைக் குறைக்க உதவும் என அவர் மேலும் சொன்னார்.

– பெர்னாமா