பெண்கள், குடும்பம் மற்றும் சமூக மேம்பாட்டு அமைச்சகம், தங்கள் முன்னாள் மனைவிகளுக்கு ஜீவனாம்சம் செலுத்தத் தவறிய ஆண்களின் வங்கிக் கணக்குகளை முடக்கும் உத்தேச நடவடிக்கை குறித்து சம்பந்தப்பட்ட அமைச்சகங்கள் மற்றும் ஏஜென்சிகளுடன் விவாதிக்கும்.

இந்த நடவடிக்கை குறித்த அரசாங்கத்தின் அறிவிப்பை வரவேற்றுள்ள அதன் அமைச்சர் ரினா முகமட் ஹருன் (Rina Mohd Harun), அமைச்சுக்கள் மற்றும் நிறுவனங்களின் ஒத்துழைப்போடு இந்த ஆண்டு நடவடிக்கையை நடைமுறைப்படுத்த முயற்சிக்கும் என்றார்.

“எங்களுக்குக் கிடைத்த தகவலின் அடிப்படையில், பல முன்னாள் கணவர்கள் ஜீவனாம்சம் வழங்கத் தவறிவிட்டனர். எனவே வெளியிடப்பட்ட அறிவிப்பின் மூலம், முன்னாள் மனைவிகள் அதைப் பெற முடியும்,’’என்று அவர் இன்று செய்தியாளர்களிடம் கூறினார்.

“ஜீவனாம்சம் செலுத்தப்படாத முன்னாள் மனைவிகள் Talian Kasih line  15999 அல்லது பிற அமைச்சக தளங்களில் புகார் செய்யலாம்,” என்று அவர் மேலும் கூறினார்.

நேற்று, அம்னோ துணைத் தலைவரான பிரதம மந்திரி இஸ்மாயில் சப்ரி யாக்கோப், 2021 ஆம் ஆண்டு கட்சியின் பொதுச் சபையில் விவாதத்தை முடித்துக் கொண்ட போது, ​​நீதிமன்ற உத்தரவை மீறும் ஆண்களின் வங்கிக் கணக்குகள் முடக்கப்படும் என்று அறிவித்தார்.

ஜீவனாம்சம் கோரி பெண்கள் வென்ற நீதிமன்ற வழக்குகள் உட்பட பெண்களைப் பாதுகாப்பதில் அரசாங்கத்தால் தீர்மானிக்கப்பட்ட விஷயங்களில் இதுவும் ஒன்றாகும் என்றார்

அதுமட்டுமின்றி, கணவர் இறந்ததைத் தொடர்ந்து விதவைகள் தனது  காத்திருப்பு காலத்தில் (நான்கு மாதங்கள் மற்றும் 10 நாட்கள்) வீட்டிலிருந்து வேலை செய்ய அனுமதிக்கப்பட்டனர், அதே நேரத்தில் இந்த துக்கத்தின் போது அலுவலகத்தில் வேலை செய்ய முதலாளிகளால் கட்டாயப்படுத்த முடியாது என்று அவர் கூறினார்.

“இது வரவேற்கத்தக்க நடவடிக்கையாகும், ஏனெனில் ஒரு பெண் தனது கணவனை இழந்த பிறகு, குழந்தைகள் மற்றும் வீடு சம்பந்தப்பட்ட பல விஷயங்களைக் கவனிக்க வேண்டும்,” என்று ரினா இந்த நடவடிக்கைக்கு பதிலளித்தார்.

“வீட்டிலிருந்து வேலை செய்யும் போது பெண்களும் சமமான திறன் கொண்டவர்கள் என்பதை கோவிட் -19 தொற்றுநோய் நிரூபித்துள்ளது,” என்று அவர் மேலும் கூறினார்.