தனது மூன்று குழந்தைகளையும் ஒருதலைப்பட்சமாக இஸ்லாத்திற்கு மாற்றியதை ரத்து செய்வதற்கான சட்டப்பூர்வ நடவடிக்கையைத் தொடங்க லோ சிவ் ஹாங்கிற்கு சிவில் நீதிமன்றம் அனுமதி வழங்கியது.

கோலாலம்பூரில் உள்ள உயர் நீதிமன்றம், அவரது முன்னாள் கணவரும் முஸ்லீம் மதம் மாறியவருமான முகமது நாகஸ்வரன் முனியாண்டியின் மதமாற்றத்தை இலக்காகக் கொண்ட நீதி மறுஆய்வு மனுவுக்கு இன்று காலை அனுமதி அளித்துள்ளது.

போதைப்பொருள் தொடர்பான குற்றச்சாட்டில் சிறையில் இருக்கும் நாகஸ்வரன், இரண்டு ஆண்டுகளுக்கு முன்பு, பிரிந்த தம்பதியின் மூன்று குழந்தைகளுடன் ஓடிப்போய், அவர்களை ஒருதலைப்பட்சமாக இஸ்லாத்திற்கு மாற்றியதாகக் கூறப்படுகிறது.

உண்மையில், இன்றைய தீர்ப்பு, சட்டரீதியான இந்த மதமாற்றலின் தகுதியை விசாரிக்க நீதிமன்றம் ஒரு தேதியை அமைக்க வழி வகுக்கும்.

ஜூம் மூலம் நடத்தப்பட்ட நடவடிக்கைகளின் போது, ​​நீதிபதி வான் அமாட் பாரிட் வான் சலே,  லோ மார்ச் 23 தேதியில் தாக்கல் செய்த நீதித்துறை மறுஆய்வு முறையான காலகெடுவில் இருப்பதாக தீர்ப்பளித்தார்.

அவர் தனது குழந்தைகளின் 2020 மதமாற்றம் குறித்த உறுதிப்படுத்தலை இந்த ஆண்டு மார்ச் 4 அன்று மட்டுமே கண்டறிந்ததாக குறிப்பிட்டார், அதாவது சட்ட நடவடிக்கையை தாக்கல் செய்வதற்கான மூன்று மாத கால அவகாசம் அந்த தேதியில் தொடங்குகிறது.

நீதித்துறை மறுஆய்வு குறித்த சட்டம், பொது அமைப்பின் முடிவு எழுந்த தேதியில் அல்லது பாதிக்கப்பட்ட தரப்பினருக்கு அந்த முடிவு குறித்து தெரிவிக்கப்பட்ட தேதியில் இருந்து 3 மாத கால அவகாசம் தொடங்குகிறது என்று நீதிபதி குறிப்பிட்டார்.

லோவின் குழந்தைகள் ஜூலை 7, 2020 அன்று மதமாற்றம் செய்யப்பட்டனர், ஆனால் இந்த ஆண்டு மார்ச் மாதத்தில்தான் அவர் அதைக் கண்டுபிடித்தார் என்றும், அட்டர்னி ஜெனரல் நீதித்துறை மறுஆய்வுக்கு அனுமதி  வழங்குவதில் எந்த ஆட்சேபனையும் இல்லை என்றும் அவர் மேலும் சுட்டிக்காட்டினார்.

முழு பராமரிப்பு

லோ கடந்த ஆண்டு டிசம்பரில் சிவில் குடும்ப நீதிமன்றம் மூலம் குழந்தைகளின் முழு பராமரிப்புக்கான உரிமையை பெற்றார்.

பிப்ரவரி 21 அன்று, கோலாலம்பூரில் உள்ள மற்றொரு உயர் நீதிமன்றம் , லோவின் ஹேபியஸ் கார்பஸ் விண்ணப்பத்தை ஏற்று அவரது மூன்று குழந்தைகளுடன் அவரை மீண்டும் இணைக்க அனுமதித்தது.

அதை அடுத்து, அவர் தனது குழந்தைகளின் மதமாற்றத்தின் செல்லுபடியை எதிர்த்து சிவில் நீதிமன்றத்திற்குச் சென்றார்.

பெற்றோரின் அனுமதியின்றி ஒரு மைனர் குழந்தையை இஸ்லாத்திற்கு மாற்றுவதற்கு ஒற்றைப் பெற்றோரை அனுமதிக்கும் பெர்லிஸ் மாநிலச் சட்டம் – அரசியலமைப்புச் சட்டப்படி செல்லாதது என்றும், 13 வயதுடைய தனது இரட்டை மகள்களும், 10 வயது மகனும் இந்துக்கள் என்றும் நீதிமன்றம் அறிவிக்க கோரி வழக்கு தொடுத்துள்ளார்.