ரப்பர் கையுறை உற்பத்தியாளரான டாப் க்ளோவ், ரப்பர்மரம் வெட்டுபவர்களுடன் இலாபங்களைப் பகிர்வதில்  Padibernas Nasional Bhd (Bernas) ஐப் பின்பற்றுமாறு வலியுறுத்தப்பட்டுள்ளது, இது நெல் விவசாயிகளுக்குப் பங்களிக்க ஒப்புக்கொண்டதைப் போன்றது.

இன்று நாடாளுமன்றத்தில் பேசிய துவான் இப்ராஹிம் துவான் மேன் (PN – Kubang Kerian), கோவிட் -19 தொற்றுநோய் உச்சத்தில் இருந்தபோது உலகளவில் கையுறைகளை வழங்குவதன் மூலம் மில்லியன் கணக்கான ரிங்கிட் இலாபம் ஈட்டிய டாப் க்ளோவ், ரப்பர்மரம் வெட்டுபவர்களுக்கு அவர்களின் துயரங்களைப் போக்க உதவிக்கரம் நீட்ட வேண்டும் என்று கூறினார்.

“ரப்பர்மரம் வெட்டுபவர் நிலையற்ற பல்வேறு சிரமங்களை எதிர்கொள்கின்றனர்,” என்று பாஸ் துணைத் தலைவர் 2023 வரவுசெலவுத் திட்டத்தை விவாதித்தபோது கூறினார்.

ரப்பர் உற்பத்தி ஊக்கத்தொகைக்கான செயல்பாட்டு விலை அளவை ஒரு கிலோவுக்கு ரிம2.50 லிருந்து ரிம2.70 ஆக உயர்த்த அரசாங்கம் முடிவு செய்திருந்தாலும், நாடு தழுவிய ரப்பர்மரம் வெட்டுபவர் கடுமையான சிக்கல்களை எதிர்கொண்டுள்ளதால் இந்த நடவடிக்கை பயனற்றது என்று அவர் கூறினார்.

“இதற்கு முன்பு, வாழை விவசாயிகள் தங்கள் பயிர்களைத் தாக்கிய ஒரு நோயால் பாதிக்கப்பட்டிருந்தனர்”.

ஆனால், தற்போது வரை அவர்களுக்கு உதவ அரசிடம் தீர்வு இல்லை. தற்போது ரப்பர் மரங்களில் நோய் பரவும் அபாயம் ஏற்பட்டுள்ளது.

“நோயால் பாதிக்கப்பட்ட ரப்பர் தோட்டங்களுக்கான நிலங்களின் அளவு என்ன என்பதை அரசாங்கம் கண்டறிந்து, ஒரு தீர்வைக் கொண்டு வர முடியுமா?”

2023 வரவுசெலவுத் திட்டத்தை மீண்டும் தாக்கல் செய்தபோது, பிரதமர் அன்வார் இப்ராஹிம், பெர்னாஸ் அதன் நிகர இலாபத்தில் 30% நெல் விவசாயிகளுக்குப் பங்களிப்பதன் மூலம் அரிசி இறக்குமதியிலிருந்து இலாபங்களைப் பகிர்ந்து கொள்ள ஒப்புக்கொண்டுள்ளதாகக் கூறினார்.

இது பெர்னாஸ் தொடர்ந்து வழங்கும் 60 மில்லியன் ரிங்கிட் பங்களிப்புக்குக் கூடுதலாகும் என்று நிதியமைச்சரான அன்வார் கூறினார்.