குழந்தைகளுக்கு எதிரான பாலியல் குற்றங்கள் சட்டம் 2017 (சட்டம் 792) இன் கீழ் 2018 முதல் கடந்த ஜனவரி வரை மொத்தம் 4,713 வழக்குகளுக்குத் தீர்வு காணப்பட்டுள்ளது.

அந்தக் காலகட்டத்தில், மொத்தம் 5,519 வழக்குகள் பதிவாகியுள்ளன மற்றும் 3,060 வழக்குகள் நீதிமன்றத்தில் விசாரிக்கப்பட்டுள்ளன என்று பிரதமர் துறை (சட்டம் மற்றும் நிறுவன மறுசீரமைப்பு) அமைச்சர் அசாலினா ஓத்மான் சைட்(Azalina Othman Said) கூறினார்.

எனவே, தண்டனைச் சட்டம் போன்ற பெரியவர்களுக்குப் பொருந்தும் பொதுவான குற்றவியல் சட்டங்களுடன் ஒப்பிடும்போது, சட்டத்தின் கீழ் குறிப்பிட்ட குற்றச்சாட்டுகளை உருவாக்குவதில் காவல்துறை மற்றும் அரசுத் தரப்புக்கு விசாரணைகளை நடத்த உதவுவதில் சட்டம் 792 இயற்றப்பட்டது ஒரு நல்ல படியாகும் என்று அவர் கூறினார்.

“ஏனென்றால், குழந்தைகள் சம்பந்தப்பட்ட பாலியல் குற்றங்களின் வழக்குகள் பெரும்பாலும் குணாதிசயங்களைக்  கொண்டிருக்கும், அவை பெரியவர்கள் சம்பந்தப்பட்ட வழக்குகளில் இல்லை. எனவே, சட்டம் 792 இல் உள்ள விதிகள் குழந்தைகளுக்கு மிகவும் துல்லியமான மற்றும் விரிவான பாதுகாப்பை வழங்க முடியும்,”என்று அவர் இன்று நாடாளுமன்றத்தில் அமைச்சரின் கேள்வி நேரத்தின்போது கூறினார்.

சட்டம் 792 அமல்படுத்தப்பட்டதிலிருந்து குழந்தைகளுக்கு எதிரான பாலியல் குற்றங்கள் தொடர்பான வழக்குகளின் எண்ணிக்கைகுறித்து இளம் சைபுரா ஒத்மான்(Syefura Othman) (Pakatan Harapan-Bentong) எழுப்பிய கேள்விக்கு அவர் பதிலளித்தார்.

தற்போதுள்ள விதிகளை மேம்படுத்துவதற்காகச் சட்டம் 792 இல் அரசாங்கம் பல திருத்தங்களைச் செய்து வருவதாக அசாலினா (மேலே) கூறினார்.

குழந்தைகள் சாட்சியம் சட்டம் 2007 (சட்டம் 676) ஐ அரசாங்கம் திருத்தும், இதன் மூலம் ஒரு குழந்தை சாட்சியின் சாட்சியத்தை வீடியோ பதிவு வடிவில் எடுக்க முடியும், இதனால் குழந்தைகள் விசாரணையில் கலந்து கொள்ள வேண்டியதில்லை (இதனால் நீதிமன்றத்தில் துஷ்பிரயோகம் செய்தவரை எதிர்கொள்ளும் அதிர்ச்சி தவிர்க்கப்படுகிறது).

இந்தத் திருத்தம் பொருத்தமற்ற கேள்விகளைக் கேட்பதைத் தடுக்க நீதிமன்றத்தை அனுமதிக்கும், இதனால் ஒரு குழந்தை சாட்சி அமைதியாகவும் வசதியாகவும் சாட்சியமளிக்க முடியும் என்று அவர் கூறினார்.

“குழந்தைகளுக்கு எதிரான பாலியல் குற்ற வழக்குக்கான குற்றவியல் நீதி அமைப்பின் செயல்பாட்டில் எடுக்கப்படும் அனைத்து நடவடிக்கைகளும் குழந்தைகளுக்கு உகந்ததாக இருக்க வேண்டும்,” என்று அவர் கூறினார்.

இதற்கிடையில், பின்னர் ஒரு செய்தியாளர் கூட்டத்தில், அசாலினா, சட்டம் 792 க்கான திருத்தம் தொழில்நுட்பத்தின் வளர்ச்சிக்கு ஏற்பப் புதிய அச்சுறுத்தல்களைச் சமாளிக்க முடியும் என்று கூறினார்.

“இந்தச் சட்டத்தில், சிறார் ஆபாசப் படங்கள்பற்றிய குறிப்பு உள்ளது. எனவே இப்போது ‘ஆபாசம்’ என்ற வார்த்தையை ‘குழந்தைகள் பாலியல் துஷ்பிரயோக பொருள்’ என்று மாற்றுவோம், “என்று அவர் கூறினார், நேரடி ஸ்ட்ரீமிங்கில் (நிகழ்நேரத்தில்) பாலியல் சம்பந்தப்பட்ட கூடுதல் குற்றங்களைச் சேர்ப்பதன் மூலம் சட்டத்தின் பிரிவு 15 இல் திருத்தங்கள் செய்யப்படும்.

“நேரடி ஒளிபரப்பான செக்ஸ் குற்றத்திற்கு 20 ஆண்டுகள்வரை சிறைத்தண்டனை அல்லது ரிம 50,000 அபராதமும், பாலியல் மிரட்டிப் பணம் பறிக்கும் குற்றத்திற்கு 10 ஆண்டுகள் சிறைத்தண்டனையும் விதிக்க நாங்கள் முன்மொழிகிறோம்,” என்று அவர் கூறினார்.