அதிக வெப்பமான சூழலில் இருப்பவருக்கு வெப்ப பக்கவாதம் ஏற்படும் அபாயம் உள்ளது, வயதானவர்கள், குழந்தைகள் மற்றும் பல்வேறு நோய்கள் உள்ளவர்கள் அதிக ஆபத்தில் உள்ளனர் என்று பொது சுகாதார நிபுணர் ஒருவர் தெரிவித்தார்.

நீரிழிவு, உயர் இரத்த அழுத்தம் மற்றும் உடல் பருமன் ஆகியவற்றால் பாதிக்கப்பட்டவர்களும் இதில் அடங்குவர் என்று டாக்டர் நோர்லன் அஹ்மட் கூறினார்.

“வயதானவர்கள் பொதுவாகப் பல்வேறு நோய்களைக் கொண்டிருப்பதால் அவர்கள் அதிக ஆபத்தில் உள்ளனர், மேலும் வியர்வை உற்பத்தி அல்லது உடல் வெப்பநிலை கட்டுப்பாட்டின் வழிமுறை இனி திறமையாக இருக்காது,” என்று சுகாதார அமைச்சின் மருத்துவர் இன்று பெர்னாமா ரேடியோவின் ‘ஜென்டெலா ஃபிகிர்'(‘Jendela Fikir’) நிகழ்ச்சியில் கூறினார்.

நோர்லனின் கூற்றுப்படி, வெப்ப பக்கவாதம் என்பது ஒரு மருத்துவ அவசரநிலை, இது விரைவாக நிகழலாம், மேலும் பாதிக்கப்பட்டவர் மூளை செயல்பாடு செயலிழப்பு, வலிப்பு மற்றும் மரணம் போன்ற மிகவும் கடுமையான நிலைமைகளை அனுபவிப்பதைத் தடுக்க உடல் வெப்பநிலையைக் குறைக்க உடனடி நடவடிக்கைகள் எடுக்கப்பட வேண்டும்.

பாதிக்கப்பட்டவரின் தலை, அக்குள், தொடைகள் மற்றும் கழுத்தில் ஈரமான துண்டை வைப்பதும், பாதிக்கப்பட்டவரைக் குளிர்ந்த மற்றும் நிழலான இடத்தில் வைத்திருப்பது உடனடி நடவடிக்கைகளில் ஒன்றாகும் என்று அவர் கூறினார்.

“உடலின் அந்தப் பகுதிகளில் ஈரமான துண்டை வைப்பது உடலில் வெப்ப பரிமாற்ற செயல்முறையை விரைவுபடுத்தும் மற்றும் உடல் வெப்பநிலையை மேலும் குறைக்கும்,” என்று அவர் விளக்கினார்.

வெப்பமான பகுதிகளில் உடல் செயல்பாடுகளைக் குறைக்கவும், அதிக தண்ணீர் குடிக்கவும், தளர்வான மற்றும் மெல்லிய ஆடைகளை அணியவும், ஆபத்தில் உள்ள குடும்ப உறுப்பினர்களின் ஆரோக்கியத்தை கண்காணிக்கவும் நோர்லென் பொதுமக்களுக்கு அறிவுறுத்தினார்.

கடந்த வாரம் பச்சோக் கிளந்தானின் கம்போங் பெருபோக்கைச்(Kampung Perupok, Bachok Kelantan) சேர்ந்த 11 வயது சிறுவன் வெப்ப பக்கவாதம் மற்றும் நீரிழப்பு காரணமாகப் பசோக்கில் உள்ள பலாய் சுகாதார கிளினிக்கில் இறந்தார்.

தீபகற்பம் மற்றும் சபாவின் சில பகுதிகளுக்கு 35 முதல் 37 டிகிரி செல்சியஸ் வரை அதிகபட்ச வெப்பநிலையுடன் லெவல் 1 வெப்பமான வானிலை எச்சரிக்கைக்கு வானிலை திணைக்களம் எச்சரிக்கை விடுத்துள்ளது.

இன்னும் சில நாட்களில் நிலைமை சீரடையும் என்று எதிர்பார்க்கப்படுகிறது.