கோலா சுங்கை துங்குலில்(Kuala Sungai Tunggul) நேற்று சடலமாகக் கண்டெடுக்கப்பட்டதைத் தொடர்ந்து, செவ்வாய்க்கிழமை முதல் புலி தாக்குதலில் காணாமல் போன படேக் பழங்குடியினத்தைச் சேர்ந்த ஒராங் அஸ்லி நபரைத் தேடும் மற்றும் மீட்பு (search and rescue) நடவடிக்கையைப் போலீசார் முடித்தனர்.

குவா முசாங் மாவட்ட காவல்துறைத் தலைவர் சிக் சூன் ஃபூ(Sik Choon Foo) கூறுகையில், 27 வயதான ஹலீம் அசினின் உடல் மாலை 5.10 மணிக்கு மீட்புக் குழுவினரால் ஆற்றில் கண்டுபிடிக்கப்பட்டது.

சம்பவம் நடந்த இடத்திலிருந்து சுமார் 2 கிலோ மீட்டர் தொலைவில் உள்ள மரத்தடியில் சிக்கிய நிலையில் அந்தப் பெண் சடலமாக மீட்கப்பட்டார்.

கம்போங் அரிங் 5 இல் உள்ள குற்றக் கட்டுப்பாட்டுச் சாவடியில் இன்று சந்தித்தபோது அவர் செய்தியாளர்களிடம் கூறுகையில், “சம்பவ இடத்திலிருந்து விலகிச் சென்றதாக நம்பப்படும் சடலம், அடர் நிற சட்டையை மட்டுமே அணிந்திருந்ததாகக் காணப்பட்டது,” என்றார்.

பாதுகாப்பு காரணங்களுக்காகப் பாதிக்கப்பட்டவரின் உடலை இன்று காலை அகற்ற முடிவு செய்ததாகவும், மதியம் 12.30 மணியளவில் சுங்கை அரிங் 5 கரையை அடைந்ததாகவும் சிக் கூறினார்.

பாதிக்கப்பட்டவரின் உடல் பிரேத பரிசோதனைக்காகக் குவா முசாங் மருத்துவமனை தடயவியல் பிரிவுக்குக் கொண்டு செல்லப்பட்டது என்று அவர் கூறினார்.

வனவிலங்கு பாதுகாப்பு மற்றும் தேசிய பூங்காக்கள் துறையின் (Perhilitan) எட்டு பணியாளர்கள் மற்றும் பொது செயல்பாட்டு படையைச் (PGA) சேர்ந்த இருவர் SAR பணியில் ஈடுபட்டுள்ளனர் என்று அவர் மேலும் கூறினார்.

இதற்கிடையில், கடந்த புதன்கிழமை முதல் தேடுதல் வேட்டையில் பங்கேற்ற பாதிக்கப்பட்டவரின் மைத்துனர் குவாங் செமெடோங், 31, ஹலீமின் உடல் கண்டுபிடிக்கப்பட்டது குறித்து ஆறுதல் தெரிவித்தார்.

“அவரது உடலை முதலில் கண்டறிந்தவர்களில் நானும் ஒருவன். இறுதியாக ஹலீம் கண்டுபிடிக்கப்பட்டபோது நான் மிகவும் சோகமாக இருந்தேன்,”என்று அவர் கூறினார்.

பாதிக்கப்பட்டவர் சுங்கை அரிங் 5 இல் தனது எட்டு வயது  அலாங் குவாங்குடன் மீன்பிடிக்கச் சென்றபோது காணாமல் போனதாகவும், புலி தாக்குதலுக்கு ஆளாகக்கூடும் என்று அஞ்சப்படுவதாகவும் தெரிவிக்கப்பட்டது.