அவசர காலங்களில் அரசாங்கம் அதன் கொள்முதல் நடைமுறைகளை மேம்படுத்த வேண்டும் என்று துணை சுகாதார அமைச்சர் லுகானிஸ்மான் அவாங் சவுனி(Lukanisman Awang Sauni) இன்று நாடாளுமன்றத்தில் தெரிவித்தார்.
இது, லுகானிஸ்மானின் (GPS-Sibuti) கூற்றுப்படி, 2021 ஆம் ஆண்டில் 100 க்கும் மேற்பட்ட வென்டிலேட்டர் இயந்திரங்களை வாங்கியதில் நடந்ததைப் போலப் பொது நிதி மீண்டும் வீணாகாது.
“அரசாங்க கொள்முதல் செயல்முறை குறித்து ஜெலுடோங் எம்பி (RSN Rayer) பகிர்ந்து கொண்ட கவலையுடன் நான் உடன்படுகிறேன்”.
“நாம் மற்றொரு அவசரகால நிலையை எதிர்கொண்டால், ஒரு ஒப்பந்தத்தை (உபகரண சப்ளையருடன்) தயாரிப்பதற்கான தேவை உட்பட ஒரு சரியான செயல்முறையை நாங்கள் கொண்டிருக்க வேண்டும்”.
“இந்த வென்டிலேட்டர்களை வாங்குவது குறித்து எங்களுக்கு ஒரு குறிப்பிட்ட ஒப்பந்தம் இல்லாததால் சிக்கல் ஏற்பட்டது. எனவே இந்த விவகாரம்குறித்து பொதுக் கணக்குக் குழு விசாரணை நடத்தும் என்று நம்புகிறேன் என்றார்”.
இரண்டு ஆண்டுகளுக்கு முன்பு சுகாதார அவசரநிலையின்போது கூட்டாட்சி அரசாங்கத்தால் வென்டிலேட்டர்களை வாங்குவது குறித்து RSN ராயர் (Harapan-Jelutong) எழுப்பிய கூடுதல் கேள்விக்கு லுகானிஸ்மான் பதிலளித்தார்.
வென்டிலேட்டர் என்பது ஒரு முக்கியமான உயிர் காக்கும் உபகரணமாகும், மேலும் கோவிட் -19 தொற்றுநோயின் உச்சத்தில் அதிக தேவை இருந்தது, இது புத்ராஜெயாவை 2021 ஆம் ஆண்டில் 136 அலகுகளை ஆர்டர் செய்யக் கட்டாயப்படுத்தியது.
எவ்வாறாயினும், சுகாதார அமைச்சுக்கு வழங்கப்பட்ட 108 இயந்திரங்கள் இணக்கமற்றவை என்று கண்டறியப்பட்டது. இதனால் அரசாங்கத்திற்கு சுமார் 13 மில்லியன் ரிங்கிட் இழப்பு ஏற்பட்டதாகத் தேசிய கணக்காய்வுத் திணைக்களத்தின் கணக்காய்வு தெரிவிக்கிறது.
