தேசத்துரோகச் சட்டத்தை முழுமையாக ரத்து செய்வதற்குப் பதிலாக அரச நிறுவனத்தைப் பாதுகாக்க அதை மறுபரிசீலனை செய்யவும் திருத்தவும் மத்திய அரசு திட்டமிட்டுள்ளதாக மனித உரிமைக் குழுவான லாயர்ஸ் ஃபார் லிபர்ட்டி (Lawyers for Liberty) இன்று கண்டனம் தெரிவித்துள்ளது.

ஒரு அறிக்கையில், பக்காத்தான் ஹராப்பானும் பிரதமர் அன்வார் இப்ராஹிமும் எதிர்க்கட்சியில் இருந்தபோது, அவர்கள் ஆட்சிக்கு வந்ததும் தேசத்துரோகச் சட்டம் ஒழிக்கப்படும் என்று உறுதியளித்ததாக LFL பிரச்சார ஒருங்கிணைப்பாளர் நபிலா கைருடின்(Nabila Khairuddin) கூறினார்.

தேசத்துரோகச் சட்டத்தை ரத்து செய்வதாக அளித்த வாக்குறுதியிலிருந்து இந்த அரசு இப்போது பின்வாங்கி, அதை ராயல்டி சம்பந்தப்பட்ட விஷயங்களுக்கு மட்டுமே பயன்படுத்துவது சீர்திருத்த வாக்குறுதிக்குச் செய்யும் துரோகமாகும்.

“அன்வார் (மேலே) மற்றும் பிற ஹராப்பான் தலைவர்கள் தேசத்துரோகச் சட்டத்தை ரத்து செய்ய அழைப்பு விடுத்தபோது அத்தகைய தகுதிகள் அல்லது நிபந்தனைகள் எதுவும் செய்யப்படவில்லை”.

“அடிப்படை உரிமைகளுக்கு விரோதமான தேசத்துரோகச் சட்டம் போன்ற ஒரு சட்டத்தைத் திருத்த முடியாது, ஆனால் அதை ஒழிக்க வேண்டும்,” என்று அவர் கூறினார்.

பிரதமர் துறை (சட்டம் மற்றும் நிறுவன சீர்திருத்தம்) அமைச்சர் அசாலினா ஓத்மான் சைட் செவ்வாய்க்கிழமை கூறுகையில், தேசத்துரோகச் சட்டம் 1948 இல் திருத்தங்களை ஆய்வு செய்ய அமைச்சரவை கொள்கையளவில் ஒப்புக் கொண்டுள்ளது.

ஆத்திரமூட்டும் செயல்களிலிருந்து அரச நிறுவனத்தைப் பாதுகாக்க மட்டுமே இந்தச் சட்டம் பயன்படுத்தப்படுவதை உறுதி செய்வதற்காக இந்த மறுஆய்வு என்று அமைச்சர் கூறியதாகக் கூறப்படுகிறது.

நபிலாவின் கூற்றுப்படி, காலனித்துவ காலத்தில் இயற்றப்பட்ட தேசத்துரோக சட்டம் ஒரு காலத்தில் தேசிய சுதந்திர போராட்ட வீரர்களை ஒடுக்கப் பயன்படுத்தப்பட்டது, இப்போது அது “வரலாற்றின் குப்பை குவியலுக்கு” சொந்தமானது.

ஹரப்பான் தலைமையிலான அரசாங்கம் இச்சட்டத்திற்கு புத்துயிர் கொடுக்கச் சதி செய்வது அதிர்ச்சியளிக்கிறது மற்றும் ஏற்றுக்கொள்ள முடியாதது என்று அவர் மேலும் கூறினார்.

“காலனித்துவ கால சட்டங்களை அகற்றி, துன்புறுத்தல் அல்லது பழிவாங்கல்களுக்கு அஞ்சாமல் மக்கள் தங்கள் கருத்துக்களை சுதந்திரமாகவும் பொறுப்புடனும் வெளிப்படுத்த முடியும் என்பதை உறுதி செய்வதற்காக, பொது உரையாடல்கள் மற்றும் விமர்சன விவாதங்களுக்கு மதிப்பளிக்கும் ஒரு முற்போக்கான சட்ட கட்டமைப்பை இந்த அரசாங்கம் ஏற்றுக்கொள்வது அவசியம் மற்றும் சரியான நேரத்தில் தேவைப்படுகிறது”.

எனவே, ஆட்சியாளர்கள் தொடர்பான விஷயங்களுக்காகத் தேசத்துரோகச் சட்டத்தைத் தக்கவைத்துக் கொள்ளும் திட்டத்தைக் கைவிட்டு, அதற்குப் பதிலாகத் தேசத்துரோகச் சட்டத்தை முழுமையாக ரத்து செய்ய வேண்டும் என்று அரசை வலியுறுத்துகிறோம்.

“அவ்வாறு செய்வதன் மூலம், கூட்டாட்சி அரசியலமைப்பு மற்றும் சர்வதேச மனித உரிமைகள் தரங்களுக்கு இணங்கப் பேச்சு சுதந்திரத்தை நிலைநிறுத்துவதில் அரசாங்கம் அதன் உறுதிப்பாட்டையும் நேர்மையையும் வெளிப்படுத்தும்,” என்று நபிலா கூறினார்.