மூவார் எம்பி சையட் சாடிக் சையட் அப்துல் ரஹ்மான், புத்ராஜெயா அரசாங்கக் கூட்டணியிலிருந்து விலகியதைத் தொடர்ந்து தொகுதியில் உள்ள நான்கு பள்ளிகளில் பல்நோக்கு அரங்குகள் கட்டுவதை நிறுத்த விரும்புவதாகக் கூறினார்.
அரசியல் பிரச்சினைகளுக்காக மாணவர்களும் ஆசிரியர்களும் தண்டிக்கப்படுவது நியாயமற்றது என்று சையட் சாடிக் இன்று பிற்பகல் நாடாளுமன்றத்தில் தனது விவாத உரையில் கூறினார்.
“மூவாரில், நான்கு புதிய அரங்குகள் கட்டுவதற்கு (அரசு) ஒப்புதல் அளித்துள்ளது. இந்த உள்கட்டமைப்புகள் சையட் சாடிக்கிற்கு சொந்தமானது அல்ல, ஆனால் ஒரு தலைமுறையிலிருந்து மற்றொரு தலைமுறைக்கு மரபுரிமையாக இருக்கும் ஆசிரியர்கள், பள்ளிகள் மற்றும் அவர்களின் பெற்றோர்-ஆசிரியர் சங்கங்களுக்குச் சொந்தமானது”.
“ஆனால், நான் எதிர்க்கட்சியில் இருக்கத் தேர்ந்தெடுத்ததால், பல மாதங்களுக்கு முன்பே திட்டங்களுக்கு ஒப்புதல் அளிக்கப்பட்ட போதிலும், இந்த வசதிகளைக் கட்டுவதை அவர்கள் நிறுத்த விரும்புகிறார்கள் என்று வதந்திகள் உள்ளன”.
12வது மலேசியத் திட்ட இடைக்கால மதிப்பாய்வைப் பற்றி விவாதிக்கும்போது, ”இன்று மதானி அரசாங்கத்தை நான் கேட்க விரும்புவது, இந்த அடிப்படைக் கட்டமைப்புகள் தேவைப்படுகிற, பொருளாதார ரீதியாக நலிவடைந்த குடும்பத்தைச் சேர்ந்த இளைஞர்கள், ஆசிரியர்களைத் தண்டிக்க வேண்டுமா? .
ஆதரவைத் திரும்பப் பெறுதல்
பிரதமர் அன்வார் இப்ராகிம் தலைமையிலான கூட்டணி அரசில் அங்கம் வகித்த மூடாக் கட்சியின் தலைவராகச் சையட் சாடிக் உள்ளார்.
மூவார் பிரதிநிதி இந்த வாரத் தொடக்கத்தில் அரசாங்கத்திற்கான தனது ஆதரவை வாபஸ் பெற முடிவு செய்தார், ஆனால் பெரிக்கத்தான் நேசனல் எதிர்க்கட்சி குழுவில் இணைவதற்கு பதிலாக நாடாளுமன்றத்தில் மூடா மூன்றாவது சக்தியாக இருக்கும் என்று வலியுறுத்தினார்.
சையட் சாடிக் தனது உரையில், அவர்கள் எப்போதும் ஆட்சியில் இருக்க மாட்டார்கள் என்றும், இதனால் நாடாளுமன்ற உறுப்பினர்களுக்கு நிதி விநியோகிப்பதில் நியாயமாக இருக்க வேண்டும் என்றும் அரசுக்கு நினைவூட்டினார்.
“தாமதமாகும் முன் இந்த அமைப்பைச் சரிசெய்யவும். நினைவில் கொள்ளுங்கள், அரசியலில் ஏற்றத் தாழ்வுகள் உண்டு. இன்று நாம் எதிர்க்கட்சி, நாளை நாம் அரசாங்கமாக இருக்கலாம்”.
