ஆடம்பர பொருட்களுக்கான வரி (The new High-Value Goods Tax) அடுத்த ஆண்டு மே 1 முதல் அமலுக்கு வரும் என நிதியமைச்சர் அன்வார் இப்ராகிம் தெரிவித்துள்ளார்.

சோங் ஜெமினுக்கு (பக்காத்தான் ஹராப்பான்-கம்பார்) எழுத்துப்பூர்வமாக அளித்த பதிலில், தனது அமைச்சகம் புதிய வரியை அமல்படுத்துவதற்கான இறுதிக் கொள்கை கட்டத்தில் இருப்பதாகவும், அதற்குப் புதிய சட்டங்கள் தேவைப்படுவதாகவும் கூறினார்.

“அமைச்சரவை முடிவடைந்தவுடன் வழிமுறை, சம்பந்தப்பட்ட பொருட்கள் மற்றும் வரி விகிதம் அறிவிக்கப்படும்,” என்று அன்வர் கூறினார்.

புதிய  HVGTயை பிரதமர் அன்வர் தனது பட்ஜெட் 2024 உரையின்போது அறிவித்தார். அப்போது, நகைகள், கைக்கடிகாரங்கள் உள்ளிட்டவற்றுக்கு வரி விதிக்கப்படும் என்றார்.

ஆதாரங்களை மேற்கோள் காட்டி அக்டோபர் 27 அன்று தி ஸ்டார் செய்தி வெளியிட்டுள்ளது, தனியார் ஜெட் விமானங்கள், படகுகள், நகைகள் மற்றும் சொகுசு கார்கள் போன்ற விலையுயர்ந்த பொருட்களுக்கு வரி விதிக்கப்படும் என்று எதிர்பார்க்கப்பட்டது.

ரிம 200,000க்கு மேல் விற்கப்படும் கார்கள், ரிம 20,000க்கு மேல் விற்கப்படும் கைக்கடிகாரங்கள் மற்றும் ரிம 10,000க்கு மேல் விலையுள்ள நகைகளுக்கு வரி விதிக்கப்படும் என்று அந்த ஆதாரம் கூறியுள்ளது.

தொழில்துறை கருத்துக்களைப் பெறுவதை நோக்கமாகக் கொண்ட ஒரு ஆவணத்தில் இந்த விஷயம் பட்டியலிடப்பட்டுள்ளது.

இதற்கிடையில், பொருட்கள் மற்றும் சேவை வரியை (GST) மறுசீரமைக்க தனது நிர்வாகம் இன்னும் முன்மொழியவில்லை என்று அன்வார் சுல்காஃப்பெரி ஹனாபியிடம் (பெரிகத்தான் நேசனல்-தஞ்சங் கராங்) கூறினார்.

“வரி தொடர்பான கொள்கையில் எந்த மாற்றமும் பொருளாதாரம் மற்றும் மக்களின் வாழ்க்கைச் செலவு ஆகியவற்றின் மீதான தாக்கத்தைக் கணக்கில் எடுத்துக்கொள்ளும்”.

அதன்படி, “அரசாங்கம் எப்போதும் தற்போதைய பொருளாதார நிலைமையைக் கண்காணித்து வருகிறது மற்றும் குறுகிய மற்றும் நடுத்தர கால தேவைகளுக்கு ஏற்ற நிதி நடவடிக்கைகளைப் பரிசீலித்து வருகிறது,” என்று அன்வார் தனது எழுத்துப்பூர்வ பதிலில் கூறினார்.