மலேசியர்களின் 400 மில்லியன் தனிப்பட்ட தரவுப் பதிவுகளை ஹேக் செய்து திருடிய சிண்டிகேட்டில் சந்தேகத்தின் பேரில் ஐவர் கைது செய்யப்பட்டுள்ளனர்.

புக்கிட் அமானின் வணிகக் குற்றப் புலனாய்வுத் துறையின் (Commercial Crime Investigation Department) இயக்குநர் ராம்லி முகமது யூசுப் கூறுகையில், 34 முதல் 52 வயதுடைய சந்தேக நபர்கள் செப்டம்பர் 5ஆம் தேதி கோலாலம்பூரில் நடந்த ஒப் கபாஸின் போது கைது செய்யப்பட்டனர்.

சந்தேக நபர்களில் நான்கு உள்ளூர்வாசிகள் மற்றும் ஒரு பாகிஸ்தானியர் இருந்துள்ளனர், அவர் சிண்டிகேட் மூளையாக இருப்பதாக நம்பப்படுகிறது.

பல்வேறு நிறுவனங்கள் மற்றும் தொடர்புடைய ஏஜென்சிகள் பயன்படுத்தும் அமைப்புகளை ஹேக் செய்து தனிப்பட்ட தரவுகளைச் சிண்டிகேட் திருடியதாக ராம்லி விளக்கினார்.

திருடப்பட்ட பெயர்கள், அடையாள அட்டை எண்கள், வீட்டு முகவரிகள், வங்கி கணக்கு விவரங்கள் மற்றும் மொபைல் போன் எண்கள் உள்ளிட்ட தகவல்கள், Query Smart Search எனப்படும் போர்ட்டலில் பதிவேற்றம் செய்யப்பட்டன.

“இந்தப் போர்ட்டலுக்கான அணுகல் ஆர்வமுள்ள நபர்களுக்கு மாதத்திற்கு ரிம 200 முதல் ரிம 800 வரை வாடகைக்கு விடப்பட்டது. ஒரு பதிவிற்கு ரிம 1.50 முதல் ரிம 2 வரை வாங்குபவர்களுக்குச் சில தரவு நேரடியாக விற்கப்பட்டது,” என்று அவர் இன்று செய்தியாளர் கூட்டத்தில் கூறினார்.

செய்தியாளர் சந்திப்பில் மலேசிய தனிநபர் தரவு பாதுகாப்பு துறை ஆணையர் முகமட் நஸ்ரி காமா மற்றும் சைபர் செக்யூரிட்டி மலேசியாவின் தலைமை தொழில்நுட்ப அதிகாரி வான் ரோஷைமி வான் அப்துல்லா ஆகியோரும் கலந்து கொண்டனர்.

இணையதள கண்காணிப்பு

சைபர் செக்யூரிட்டி மலேசியா, பல்வேறு நிறுவனங்கள் மற்றும் ஏஜென்சிகளில் பதிவு செய்யப்பட்டதாக நம்பப்படும் பயனர் தகவல்களைக் கொண்ட, dataserver1.mypsx.net என்ற இணையதளத்தைக் கண்காணித்த பிறகு, சிண்டிகேட்டின் செயல்பாடுகளை ஆரம்பத்தில் கண்டறிந்ததாக ராம்லி கூறினார்.

அடையாளம் காணப்பட்ட வாடகைதாரர்கள் மற்றும் வாங்குபவர்களில் பெரும்பாலோர் உரிமம் பெறாத கடன் வசூல் நிறுவனங்கள் என்றும், மற்ற சிண்டிகேட்கள் இந்தச் சிண்டிகேட்டின் சேவைகளைப் பயன்படுத்தியிருக்கலாம் என்றும் அதிகாரிகள் நம்புகிறார்கள் என்றார்.

தனிப்பட்ட தரவுகளை விற்றதற்காகத் தனிப்பட்ட தரவு பாதுகாப்புச் சட்டம் 2010 இன் பிரிவு 130(4) இன் கீழ் அக்டோபர் 11 ஆம் தேதி பாகிஸ்தானியர் மீது இரண்டு குற்றச்சாட்டுகள் சுமத்தப்பட்டன, மேலும் அதே சட்டத்தின் பிரிவு 130(7) இன் கீழ் அவர் தண்டிக்கப்படலாம்.

“47 வயதான பாகிஸ்தானியர் சுமார் 10 ஆண்டுகளுக்கு முன்பு ஒரு பொது ஊழியராக மலேசியாவில் நுழைந்தார், ஆனால் சுமார் ஒரு வருடமாக ஹேக்கிங்கில் ஈடுபட்டதாக நம்பப்படுகிறது,” என்று அவர் கூறினார்.

மற்ற நான்கு சந்தேக நபர்கள், மூன்று பேர் உரிமம் பெறாத கடன் வசூலிப்பவர்கள் என்று நம்பப்படுகிறது, அவர்கள் போலீஸ் ஜாமீனில் விடுவிக்கப்பட்டனர் என்றார்.