மலாக்கா சுகாதாரத் துறை, மாநிலத்தில் இ-சிகரெட்டுகள் அல்லது வேப் பொருட்களை உற்பத்தி செய்வதையும் விற்பனை செய்வதையும் தடை செய்வதற்கான திட்டத்தைத் தயாரித்து வருகிறது.

இந்த ஆண்டு இறுதியில் இந்த முன்மொழிவு மாநில நிர்வாகக் குழுவில் ஒரு முடிவிற்காகச் சமர்ப்பிக்கப்படும் என்று மாநில சுகாதாரம், மனிதவளம் மற்றும் ஒற்றுமைக் குழுவின் தலைவர் நங்வே ஹீ செம் தெரிவித்தார்.

“இந்தக் கட்டத்தில், தடையை ஆதரிப்பதா அல்லது நிராகரிப்பதா என்பது குறித்து மாநில அரசு இன்னும் ஒரு நிலைப்பாட்டை எடுக்கவில்லை, ஏனெனில் இந்த விஷயம் இன்னும் பரிசீலனையில் உள்ளது,” என்று அவர் இன்று ஸ்ரீ நெகேரியில் மலாக்கா சட்டமன்றக் கூட்டத்தில் கூறினார்.

மின்-சிகரெட் விற்பனையில் மாநில அரசின் நிலைப்பாடுகுறித்து கேட்ட லோ சீ லியோங்கின் (Harapan–Kota Laksamana) கேள்விக்கு அவர் பதிலளித்தார்.

வழக்கமான புகைபிடிப்பிற்கு பாதுகாப்பான மாற்றாக மின்-சிகரெட்டுகள் பெரும்பாலும் காணப்பட்டாலும், அவற்றின் நிக்கோடின் உள்ளடக்கம் இன்னும் போதைப்பொருள் அபாயங்களையும் உடல்நலக் கேடுகளையும் ஏற்படுத்துகிறது, மேலும் அவை எந்த வகையிலும் 100 சதவீதம் பாதுகாப்பானவை அல்ல என்று நிங்வே விளக்கினார்.

வேப் திரவங்களில் நிக்கல், குரோமியம் மற்றும் ஆர்சனிக் போன்ற பல்வேறு தீங்கு விளைவிக்கும் கன உலோகங்கள் உள்ளன, இவை அனைத்தும் புற்றுநோய்க்கான சர்வதேச ஆராய்ச்சி நிறுவனத்தால் குரூப் 1 புற்றுநோய் காரணிகளாக வகைப்படுத்தப்பட்டுள்ளன, மேலும் அவை புற்றுநோயை உண்டாக்கும் என்று அறியப்படுகிறது.

“அவற்றில் நுரையீரலுக்கு நச்சுத்தன்மையுள்ள கோபால்ட் மற்றும் சிறுநீரகங்களைச் சேதப்படுத்தும் மற்றும் புற்றுநோயுடன் தொடர்புடைய காட்மியம் ஆகியவை உள்ளன.”

“இன்னும் கவலைக்குரிய விஷயம் என்னவென்றால், இந்த வேதியல் பொருட்கள்  மனச்சோர்வு உள்ளிட்ட மனநலப் பிரச்சினைகளுடன் தொடர்புடையவை,” என்று அவர் வலியுறுத்தினார்.