உள்ளூர் பொருளாதாரத்தையும் சுற்றுலாவையும் பாதுகாப்பதற்காக விமானம் மற்றும் கப்பல் வாடகைக்கு சேவை வரியிலிருந்து விலக்கு அளிக்கும் முடிவு எடுக்கப்பட்டுள்ளதாகப் புத்ராஜெயா இன்று தெரிவித்துள்ளது.

உள்ளூர் உரிமையாளர்கள் தங்கள் கப்பல்கள் மற்றும் விமானங்களைப் பிற நாடுகளில் பதிவு செய்வதைத் தடுக்க வரி விலக்கு அளிக்கப்பட்டுள்ளதாக நிதி அமைச்சகம் ஒரு அறிக்கையில் தெரிவித்துள்ளது.

“வரி விதிப்பது உள்ளூர் விமானங்கள் மற்றும் கப்பல் உரிமையாளர்களை வெளிநாடுகளில் பதிவு செய்யத் தள்ளும், மேலும் இது மலேசியாவில் பொருளாதார மற்றும் சுற்றுலா நடவடிக்கைகளைக் குறைக்கும்.”

“இரண்டாவதாக, உள்ளூர் தொழில்துறை போட்டித்தன்மையை உறுதி செய்வதாகும். அண்டை நாடுகள் அத்தகைய வரியை விதிக்காததால், இந்த விலக்கு அளிக்காதது வாடிக்கையாளர்கள் வெளிநாடுகளிலிருந்து கப்பல் அல்லது விமான சேவைகளைத் தேர்வுசெய்ய வழிவகுக்கும்,” என்று அது கூறியது.

நாட்டின் விநியோகச் சங்கிலி, சுற்றுலா மற்றும் பொருளாதாரத்தில் முக்கிய பங்கு வகிப்பதால், குறிப்பாகக் கடல்சார் மற்றும் விமானத் தொழில்களுக்கு இந்த விலக்கு அளிக்கப்பட்டுள்ளதாக அமைச்சகம் தெரிவித்துள்ளது.

“இது வெவ்வேறு செயல்பாடுகளைக் கொண்ட கார் மற்றும் பேருந்து வாடகைகள் அல்லது வணிக வளாகங்களின் குத்தகை போன்ற பிற வாகன குத்தகை சேவைகளுக்குப் பொருந்தாது.”

அரசாங்கம் இந்த முடிவை அமைதியாகச் செயல்படுத்துவதன் மூலம் ரகசியமாக வைத்திருக்க முயற்சிப்பதாக எழுந்த குற்றச்சாட்டுகளையும் அமைச்சகம் மறுத்தது.

இந்த நடவடிக்கை ஜூலை 24 அன்று சுங்கத் துறையின் MySST போர்டல் மூலம் அறிவிக்கப்பட்டதாக அது கூறியது.

இந்த வாரத் தொடக்கத்தில், முன்னாள் BN  மூலோபாய தகவல் தொடர்பு துணை இயக்குனர் எரிக் சீ-டூ(Eric See-To), வரி விலக்கு நடவடிக்கைகுறித்து அரசாங்கத்தை விமர்சிக்க முகநூலில் பதிவு செய்தார்.

கடைகள், போட்டோஸ்டாட் இயந்திரங்கள், கார்கள் மற்றும் பேருந்துகளுக்கான வாடகை போன்ற எட்டு சதவீத சேவை வரிக்கு உட்பட்ட பிற வாடகை சேவைகளுடன் அவர் இந்த முடிவை ஒப்பிட்டார்.

“கார்கள், பேருந்துகள் அல்லது கடைகளை வாடகைக்கு எடுக்கும் சாதாரண குடிமக்கள் வரி செலுத்த வேண்டும், ஆனால் கப்பல்கள் மற்றும் ஜெட் விமானங்களை வாடகைக்கு எடுப்பவர்களுக்கு விலக்கு அளிக்கப்படுகிறது,” என்று அவர் கூறினார்.