தலைவர்களைத் தேர்ந்தெடுக்கும்போது மக்கள் ஆளுமை மற்றும் உணர்வுகளை நம்பியிருப்பதால், நாட்டில் பயனற்ற தலைமை உருவாகியுள்ளது என்று முன்னாள் பொருளாதார அமைச்சர் ரஃபிஸி ரம்லி கூறினார்.
PKR நாடாளுமன்ற உறுப்பினர் கூறியதாவது, நாட்டை நிர்வகித்துச் சிக்கல்களைத் தீர்ப்பதற்காகப் பிரதமர் அல்லது பிற அமைச்சர்கள் ஆகிய அரசியல் தலைவர்கள் மக்களிடமிருந்து சம்பளம் பெறுகின்றனர் என்பதையும் பொருட்படுத்தாமல் இந்த நிலை ஏற்பட்டுள்ளது.
“நாங்கள் திறமையான தலைவர்களைத் தேர்ந்தெடுக்கும்போது, அவர்களின் திறன்கள் அல்லது நிர்வாகத்தில் அல்லது பிரச்சினைகளைத் தீர்ப்பதில் உள்ள அறிவை அல்ல, மாறாக, உணர்வுகள் மற்றும் ஆளுமையைப் பயன்படுத்தித் தேர்ந்தெடுக்கிறோம்”.
“நம் சமூகத்தைப் பாதிக்கும் விஷயம் இதுதான்… நமக்குப் பல பிரதமர் வேட்பாளர்கள் இருக்கிறார்கள், ஆனால் பிரச்சினைகளைத் தீர்க்கும் வழிமுறைகள் இல்லை”.
“இந்தச் சுழற்சி தொடர்ந்து கொண்டு, பிரச்சினைகள் தீர்க்கப்படாமல் விட்டுவிடப்படுகின்றன. இறுதியில், தலைவர்களின் ஊதியம் பெறாத ஆதரவாளர்களுக்குக் கூடப் பாதிப்பு ஏற்படுகிறது,” என்று அவர் இன்று முகநூலில் தெரிவித்தார்.
குறிப்பாக யாரையும் அவர் குறிப்பிடவில்லை என்றாலும், ரஃபிஸி தனது கட்சி உட்பட பல்வேறு அரசியல் கட்சிகளையும் பாதிக்கும் பிரச்சினைகள்குறித்து பேசினார்.
மற்றவற்றுடன், பெர்சத்துவின் தலைவர் முகிடின்யாசினை வெளியேற்றப் பெர்சத்துவுக்குள் சில பிரிவுகள் மேற்கொண்டதாகக் கூறப்படும் முயற்சிகளையும் பாண்டன் சட்டமன்ற உறுப்பினர் குறிப்பிட்டார்.
தனது சொந்தக் கட்சியைப் பொறுத்தவரை, முன்னாள் பிகேஆர் துணைத் தலைவர், கட்சித் தேர்தல்கள் முடிந்தாலும், பல உறுப்பினர்கள் இன்னும் இதனால் வேதனைப்படுவதாகவும், வாக்காளர்கள் மத்தியிலும் கூட இது தெளிவாகத் தெரிந்ததாகவும் கூறினார்.
அவதூறு, இணையவழி மிரட்டல்
தனது பதிவில், தங்கள் எதிரிகளைத் தொடர்ந்து விரும்பத் தகாத கருத்துக்கள் மற்றும் அவமதிப்புகளைப் பயன்படுத்தி விமர்சிக்கும் கட்சி ஆதரவாளர்களையும் ரஃபிஸி கடிந்து கொண்டார், அவர்கள் அவதூறு பாவத்தைச் சுமக்கிறார்கள் என்பதை அவர்களுக்கு நினைவூட்டினார்.
அவர்கள் சமூக ஊடகங்களில் கூறும் அவமதிப்புகள் அடிக்கடி இணையத் தொல்லையாக (சைபர் புல்லியிங்) மாறிவிடுகின்றன என்று அவர் கூறினார்.
“ஆக, புதிய தலைவர் வந்தாலும் பிரச்சனை முடிவதில்லை. இகழ்ச்சிகள் தொடர்கின்றன, சுழற்சியும் நீடிக்கிறது,” என்றும் அவர் கூறினார்.
