கம்போங் சுங்கை பாரு வெளியேற்றம்: நகர மறுசீரமைப்பு சட்டத்தின் ஓர் (URA) இருண்ட முன்னோட்டம் – ப. இராமசாமி, தலைவர், உரிமை
மலேசிய ஒன்றிய உரிமை கட்சி (உரிமை), தங்கள் சொந்த இல்லங்களில் தங்கிக்கொள்ளும் நீண்டகால விருப்பத்திற்கு ஏற்ற, நல்லிணக்கமான மற்றும் நியாயமான தீர்வை நாடும் கம்போங் சுங்கை பாரு குடியிருப்பாளர்களின் போராட்டத்துடன் உறுதியாக துணைநின்று கொண்டிருக்கிறது.
நீதிமன்ற நடைமுறை முழுமையாக முடிவுக்கு வருவதற்கு முன்பே, மேம்பாட்டாளர், போலீசார் மற்றும் பிற அரசியல் அமைப்புகளின் ஆதரவுடன், எக்ஸ் பார்ட்டே (ex parte) நீதிமன்ற உத்தரவை பெற்று மீதமுள்ள குடியிருப்பாளர்களை வெளியேற்றச் செய்கின்றனர்.
அமுலாக்க அணியும் குடியிருப்பாளர்களும் மோதியபோது, டாங் வாங்கி மாவட்டக் காவல் நிலையத் தலைமை அதிகாரி காயமடைந்தது மிகுந்த துரதிர்ஷ்டகரமானது. ஆனால், போலீசார் ஏன் இவ்வளவு வன்முறையாக நடந்துகொண்டார்கள் என்ற கேள்வி எழுகிறது. மென்மையான, மனிதநேயமான அணுகுமுறையோடு நிலைமையை சமாளிக்க முயன்றிருக்கலாம்.
நீதிமன்ற உத்தரவு வெளியேற்றத்தைக் கொண்டிருந்தாலும், ஏன் மேம்பாட்டாளர் உடனே புல்டோசர்களைக் கொண்டு வீடுகளை இடித்தார் என்பது புரியவில்லை. வெளியேற்றம் என்பது எப்போதும் இடிப்பு என்று அர்த்தமில்லை. சட்ட ரீதியாக கேள்வி எழுகிறது: வெளியேற்ற உத்தரவு வீடுகளை இடிக்க அனுமதி தந்ததா? அல்லது இது குடியிருப்பாளர்களின் வழக்கறிஞர்கள் சவாலிட வேண்டிய அளவுக்கு அத்துமீறலா?
பிரதமர் அன்வார் இப்ராஹிம் குடியிருப்பாளர்களுக்கு அனுதாபம் காட்டுவதற்குப் பதிலாக, காயமடைந்த காவல் துறைத் தலைவரை முன்னிறுத்தி, கிராமவாசிகளுக்கு எதிராக கடுமையான நடவடிக்கை எடுக்க வேண்டும் என்று கூறியுள்ளார். அதிகாரிகளைத் தணிக்க நினைத்த அவசரத்தில், பிரச்சனையின் அடிப்படைக் காரணத்தை அவர் கவனிக்கவில்லை: போலீசார் கருணையும் பொறுமையும் காட்டியிருந்தால் இம்மோதல் ஏற்பட்டிருக்காது.
இவர் தான் “மதானி” அல்லது கருணைமிகு அரசை வழிநடத்துவதாகக் கூறும் பிரதமரா?
நிலம் மேம்பாட்டாளருக்கு விற்கப்பட்டதை யாரும் மறுப்பதில்லை. ஆனால், குடியிருப்பாளர்கள் தங்கள் முழுமையான சட்ட நடைமுறையை நிறைவு செய்யும் வரை அரசு பாதுகாத்திருக்க வேண்டும்.
வெளியேற்றங்கள் மோதலாக இருக்க வேண்டிய அவசியமில்லை; அவை கண்ணியத்துடனும் மனிதநேயத்துடனும் நடத்தப்படலாம்.
ஆனால், காவல் அதிகாரி காயமடைந்ததைத் தொடர்ந்து, அதிகாரிகள் உறுதியான மற்றும் வன்முறைமிகு முறையில் கம்போங் சுங்கை பாருவை வலுக்கட்டாயமாக வெளியேற்ற முற்பட்டனர்.
பாஸ் தகவல் தலைவர் பாட்லி ஷாரி எச்சரித்தது சரியானதே; கம்போங் சுங்கை பாருவின் வெளியேற்றம், நகர மறுசீரமைப்பு சட்டம் (URA) நிறைவேற்றப்பட்டால், நகரவாசிகள் எதிர்கொள்ளக்கூடிய இருண்ட முன்னோட்டமாகும்.
URA சட்டமாகிய பிறகு, மத்திய மற்றும் மாநில அரசுகள் மேம்பாட்டாளர்களுக்கு அசாதாரண அதிகாரங்களை அளிக்கும். இது நகரப் பகுதிகளின் நிலைப்பாட்டையே அடிப்படையாக மாற்றும். பொதுமக்கள்—குறிப்பாக ஏழைகள்—அரசும் மேம்பாட்டாளர்களும் இணைந்த அழுத்தத்திற்கு எதிராக தங்களை பாதுகாக்க இயலாமல் போவார்கள்.
கம்போங் சுங்கை பாருவில் நடந்தது, URA சட்டமாகும் முன்பே. இப்படிப்பட்ட சட்டம் நடைமுறையில் இருந்திருந்தால் என்ன நிகழ்ந்திருக்கும் என நினைத்தாலே நடுங்க வைக்கிறது.
