எம்சிஏ கட்சி பாரிசான் நேசனல் கூட்டணியிலிருந்து வெளியேறக்கூடும் என்ற யூகங்களை அதன் தலைவர் வீ கா சியோங் நிராகரித்துள்ளார். தற்போதைய நிலையில் அத்தகைய கேள்விக்கே இடமில்லை என்று அவர் கூறினார்.

சுதந்திரத்திற்கு முந்தைய அலையன்ஸ் கட்சியின் (Alliance Party) உணர்வின் அடிப்படையில் 1973-இல் உருவாக்கப்பட்ட பாரிசான்  கூட்டணியில் எம்சிஏ தொடர்ந்து நீடிக்கும் என்று வீ தெரிவித்தார்.

இன்று நடைபெற்ற 2025-ஆம் ஆண்டுக்கான அம்னோ பொதுச் சபைக் கூட்டத்தின் தொடக்க நிகழ்வில் கலந்து கொண்ட பிறகு செய்தியாளர்களிடம் பேசிய அவர், “எனவே, தற்போதைய சூழலில் இந்தப் பேச்சுக்கே இடமில்லை,” என்றார்.

முன்னதாக, தனது தொடக்க உரையில் பேசிய அம்னோ தலைவர் அஹ்மத் ஜாஹித் ஹமிடி, எம்சிஏ மற்றும் மஇகா ஆகிய கட்சிகள் கூட்டணியை விட்டு வெளியேறவோ அல்லது கோபித்துக் கொள்ளவோ  வேண்டாம் என்றும், பாரிசான் எனும் பெரிய குடையின் கீழ் தொடர்ந்து இருக்குமாறும் “அறிவுரை” வழங்கினார்.

உடன்பிறந்தவர்களுக்குள் சில நேரங்களில் மோதல்கள் இருப்பது தவிர்க்க முடியாதது என்று குறிப்பிட்ட ஜாஹித், ஆனால் இறுதியில் அனைவரும் ஒன்றிணைந்து இருக்க வேண்டும் என்றார்.

மேலும், தேசிய நலன் கருதி அம்னோ ஒற்றுமை அரசாங்கத்தில் இணைந்தது, 51 ஆண்டுகளுக்கு முன்பு அம்னோ, எம்சிஏ மற்றும் மஇகா ஆகிய கட்சிகளால் கூட்டாகத் தோற்றுவிக்கப்பட்ட பாரிசான்  கூட்டணிக்குள் சில பதற்றங்களை ஏற்படுத்தியுள்ளது என்பதையும் அவர் ஒப்புக்கொண்டார்.

அம்னோவின் ‘ருமா பாங்சா’ (Rumah Bangsa) திட்டத்தின் கீழ் மலாய் ஒற்றுமையை வலுப்படுத்தும் முயற்சி வெற்றிபெற வேண்டும் என்றும், அது ஒட்டுமொத்த பிஎன் கூட்டணிக்கும் நன்மையளிக்கும் என்றும் வீ கா சியோங் நம்பிக்கை தெரிவித்தார்.

“இது ஒரே வீட்டிற்குள் இருக்கும் கட்சிகளைப் போன்றது. இது இழந்த நம்பிக்கையை மீட்டெடுப்பது மட்டுமல்லாமல், ஆதரவையும் மீண்டும் வென்றெடுப்பதற்கான முயற்சியாகும்,” என்று ஆயர் ஈத்தாம் நாடாளுமன்ற உறுப்பினரான அவர் கூறினார்.

மேலும், பாரிசான் கூட்டணியின் நிலையை சாதகமாக மாற்றக்கூடிய எந்தவொரு அணுகுமுறை அல்லது விவாதம் குறித்தும் பேச எம்சிஏ தயாராக உள்ளது என்றும் அவர் தெரிவித்தார்.

“மலாய் மற்றும் இஸ்லாமிய விவகாரங்களில் அவர்கள் தங்கள் சமூகத்திற்குள் விவாதிக்கலாம். அதேபோல் எம்சிஏ-வும் கலந்துரையாடத் தயாராக உள்ளது. அதில் எந்தப் பிரச்சினையும் இல்லை. ஆனால், பல்லின மக்கள் வாழும் இந்தச் சமூகத்தில், பன்முகத்தன்மை மற்றும் அரசியல் எதார்த்தங்களை நாம் கருத்தில் கொள்ள வேண்டும்,” என்று வீ கா சியோங் கூறினார்.

-fmt