கிடைக்கக்கூடிய ஆதாரங்களில் உள்ள சிக்கல்கள் காரணமாக, ஒரு தனித்தாயைத் தாக்கியதாகக் கூறப்படும் நபர்மீதான பாலியல் வன்கொடுமைக் குற்றச்சாட்டு, குறைவான தீவிரத்தன்மை கொண்ட குற்றமாக மாற்றப்பட்டதாகத் தலைமை வழக்கறிஞர் அலுவலகம் (AGC) தெரிவித்துள்ளது.

பாதிக்கப்பட்டவரின் சாட்சியத்திலும் மருத்துவ அறிக்கையின் கண்டுபிடிப்புகளிலும் முரண்பாடுகளை மேற்கோள் காட்டி, குற்றம் சாட்டப்பட்டவரின் வழக்கறிஞர் பிரதிநிதித்துவக் கடிதத்தைச் சமர்ப்பித்த பிறகு அனைத்து ஆதாரங்களும் முழுமையாக ஆய்வு செய்யப்பட்டுள்ளதாக அட்டர்னி ஜெனரல் துசுகி மொக்தார் கூறினார்.

தன்னைத் தாக்கியவர் மீதான பாலியல் வன்கொடுமை குற்றச்சாட்டு அவருக்குத் தெரியாமல் ஒரு சிறிய குற்றமாகக் குறைக்கப்பட்ட பின்னர், ஏஜிசியிடம் விளக்கம் பெற ஒற்றைத் தாயான லோ வை முன் மேற்கொண்ட முயற்சியை விவரிக்கும் மலேசியாகினியின் அறிக்கைக்குப் பதிலளிக்கும் விதமாகத் துசுகி இவ்வாறு கூறினார்.

அவரைத் தாக்கியவர், தொடக்கத்தில் பெட்டாலிங் ஜெயா செஷன்ஸ் நீதிமன்றத்தில் தண்டனைச் சட்டம் பிரிவு 376-ன் கீழ் கற்பழிப்பு குற்றத்திற்காக விசாரணையை எதிர்கொள்வதாகக் கூறினார். பின்னர், ஒரு பெண்ணின் கண்ணியத்திற்கு ஊறு விளைவிக்கும் நோக்கத்தில் தாக்குதல் நடத்தியதற்காக, தண்டனைச் சட்டம் பிரிவு 354-ன் கீழ் குறைக்கப்பட்ட குற்றச்சாட்டை ஒப்புக்கொண்டார்.

பெட்டாலிங் ஜெயா நீதிமன்றம், சிலாங்கூர்

பிரிவு 376, பாலியல் வன்கொடுமை செய்பவர்களுக்கு 20 ஆண்டுகள்வரை சிறைத்தண்டனை மற்றும் பிரம்படி விதிக்கப்படலாம். மறுபுறம், பிரிவு 354 இன் கீழ் குற்றவாளிகள் என நிரூபிக்கப்பட்டவர்களுக்கு அதிகபட்சம் 10 ஆண்டுகள்வரை சிறைத்தண்டனை, அபராதம் அல்லது பிரம்படி விதிக்கப்படலாம்.

அக்டோபர் 6 ஆம் தேதி குற்றச்சாட்டில் திருத்தங்கள் செய்யப்பட்டதைத் தொடர்ந்து, அக்டோபர் 23 ஆம் தேதி நீதிபதி சியாலிசா வார்னோ, தாக்குதல் நடத்தியவரைக் குற்றவாளி என்று தீர்ப்பளித்து ரிம 10,000 அபராதம் விதித்தார்.

திருத்தப்பட்ட குற்றச்சாட்டுகுறித்து கருத்து தெரிவித்த துசுகி, AGC-யின் முடிவு சட்டக் கொள்கைகளுக்கு ஏற்ப எடுக்கப்பட்டது என்பதை உறுதிப்படுத்தினார்.

குறிப்பாக, நீதிமன்றத்தில் தண்டனை பெறுவதற்கு ஆதாரத்தின் சுமை பூர்த்தி செய்யப்பட வேண்டும் என்ற அரசுத் தரப்பின் தேவையை அவர் சுட்டிக்காட்டினார்.

“AGC எடுத்த முடிவு எந்தவொரு தரப்பினரின் அனுபவத்தையோ அல்லது துன்பத்தையோ மறுக்கும் நோக்கம் கொண்டதல்ல”.

“ஒவ்வொரு வழக்கும் நியாயமாகவும், வெளிப்படையாகவும், சட்டத்தின்படியும் கையாளப்படுவதை உறுதி செய்வதில் AGC உறுதியாக உள்ளது என்பதை வலியுறுத்துகிறோம்,” என்று அவர் மேலும் கூறினார்.

அட்டர்னி ஜெனரல் அறைகள், புத்ராஜெயா

தகவல் தொழில்நுட்பத் (IT) துறையின் முன்னாள் ஊழியரான லோ என்பவருக்கு எதிரான இந்தத் தாக்குதல் ஜூன் 9 அன்று நடைபெற்றது. அன்று அவர் தனது முன்னாள் அண்டை வீட்டாருடன் அவருடைய அலுவலகத்திற்குச் சென்றபோது, அவர் லோவை வலுக்கட்டாயமாகத் தடுத்து நிறுத்தி, மயக்க மருந்து கொடுத்து, பாலியல் வன்கொடுமை செய்ததாகக் கூறப்படுகிறது

கோத்தா தமன்சாரா காவல் நிலையத்தின் முன் மேசையில் (front desk) இருந்த அதிகாரி ஒருவர், விசாரணை அதிகாரியைச் சந்திப்பதற்கு முன்னதாக வீட்டிற்குச் சென்று குளித்துவிட்டு வருமாறு லோவிடம் கூறியுள்ளார். இதிலிருந்து தொடங்கி, தனது வழக்கைக் காவல்துறையினர் கையாண்ட விதத்தில் கடுமையான குறைபாடுகள் இருந்ததாக லோ இதற்கு முன்னர் மலேசியாகினியிடம் (Malaysiakini) தெரிவித்திருந்தார்.

முன்னறிவிப்பு ஏதுமின்றி தனது வழக்கு பெண் விசாரணை அதிகாரியிடமிருந்து ஆண் அதிகாரிக்கு மாற்றப்பட்டதாகவும், குற்ற இடத்திற்குச் சென்றபோது தான் மிகவும் கடுமையாகவும் உணர்ச்சியற்ற முறையிலும் நடத்தப்பட்டதாகவும் அவர் மேலும் தெரிவித்தார்.

இதுவரை, அவரது ஆடைகளின் தடயவியல் பகுப்பாய்வு மற்றும் அவரது மருத்துவப் பரிசோதனை முடிவுகள் குறித்து அவருக்கு எதுவும் தெரிவிக்கப்படவில்லை. மேலும், சமர்ப்பிக்கப்பட்ட ஆதாரங்களின் அடிப்படையில் டிஎன்ஏ (DNA) பரிசோதனை செய்யப்பட்டதா என்பது குறித்தும் அவருக்குத் தகவல் அளிக்கப்படவில்லை.

“புதன்கிழமை அன்று, லோ-வின் மேல்முறையீடு தொடர்பாகச் சட்ட தலைமை அலுவலகத்திடமிருந்து (AGC) விளக்கம் கோரும் விவகாரத்தில், பிரதமருக்கான துறை அமைச்சர் (சட்டம் மற்றும் நிறுவன சீர்திருத்தம்) அசலினா ஒத்மான் சைட் தலையிட வேண்டும் என்று DAP ஆலோசகர் லிம் குவான் எங் அழைப்பு விடுத்தார்.”

“பெண்களின் பாதுகாப்பைக் கண்காணிப்பதும், பாலியல் வன்கொடுமையால் பாதிக்கப்பட்டவர்களுக்குரிய நீதி கிடைப்பதை உறுதி செய்வதும் அரசாங்கத்தின் கடமை என்று பாகன் நாடாளுமன்ற உறுப்பினர் வலியுறுத்தினார்.”