“நேற்று அதிகாலை புக்கிட் காயூ ஈத்தாம் மலேசிய எல்லைக் கட்டுப்பாடு மற்றும் பாதுகாப்பு முகமையின் (MCBA) தளபதி நாசருதீன் நாசிர் ஓட்டிச் சென்ற வாகனத்தின் மீது துப்பாக்கிச் சூடு நடத்தப்பட்ட விவகாரத்தில் ஒருவர் கைது செய்யப்பட்டுள்ளார்.”

இருப்பினும், கைது செய்யப்பட்ட சந்தேக நபர் குறித்த கூடுதல் விவரங்களை உள்துறை அமைச்சர் சைஃபுதீன் நசுதியோன் இஸ்மாயில் வெளியிடவில்லை.

“நாங்கள் (காவல்துறை) 24 மணி நேரத்திற்குள் கைது செய்துவிட்டோம்”.

இன்று நாடாளுமன்றத்தில் சித்தி ஜைலா இஸ்மாயிலின் (PN-Rantau Panjang) துணை கேள்விக்கு பதிலளித்த அவர், “இப்போது சந்தேக நபர் விசாரிக்கப்படுகிறார்,” என்று அமைச்சரின் கேள்வி நேரத்தின் போது கூறினார்.

நேற்று நசிருதீன் ஓட்டிச் சென்ற வாகனத்தின் மீது துப்பாக்கிச் சூடு நடத்திய நபர், ஒரு அரை-தானியங்கி (semi-automatic) துப்பாக்கியைப் பயன்படுத்தியிருக்கலாம் என்று சிதறிய தோட்டாத் துண்டுகளைக் கொண்டு நம்பப்படுவதாகக் கெடா மாநில காவல்துறைத் தலைவர் அட்ஸ்லி அபு ஷா தெரிவித்தார்.

கெடா காவல்துறை தலைவர் அட்ஜ்லி அபு ஷா

பாதிக்கப்பட்டவரின் நகர்ந்து கொண்டிருந்த வாகனத்தை நோக்கி சுமார் ஒரு மீட்டர் தூரத்திலிருந்து இரண்டு முறை துப்பாக்கிச் சூடு நடத்தப்பட்டதை முதற்கட்ட விசாரணைகள் உறுதிப்படுத்தியுள்ளதாக அவர் கூறினார்.

“சிதறிய தோட்டா துண்டுகளைக் கண்டெடுத்ததால், துப்பாக்கிச் சூடு நடத்தியவர் அரை தானியங்கி (semi-automatic) ஆயுதத்தைப் பயன்படுத்தியிருக்கலாம் என்று நாங்கள் நம்புகிறோம்,” என்று அட்லி கூறியதாக மேற்கோள் காட்டப்பட்டுள்ளது.

அறிக்கைகளின்படி, பாதிக்கப்பட்டவர் தனியாக வாகனத்தை ஓட்டிச் சென்றபோது, கருப்பு நிற உடை அணிந்து, முழு முகத்தையும் மறைக்கும் தலைக்கவசம் (full-face helmet) அணிந்திருந்த இருவர் மோட்டார் சைக்கிளில் வந்து இச்சம்பவத்தில் ஈடுபட்டதாக அட்லி தெரிவித்தார்.

நாட்டின் எல்லைகள் பாதுகாப்பாக இருப்பதை உறுதி செய்யும் இந்தப் பணி மிகவும் ஆபத்தானது என்று சைபுதீன் இன்று குறிப்பிட்டார்.

“இது எல்லைக் கட்டுப்பாட்டுடன் தொடர்புடையது என்றால், அந்தப் பணியின் தன்மை உண்மையில் பல்வேறு அச்சுறுத்தல்களுக்கு ஆளாகிறது.”

“மக்களின் நடமாட்டம் மற்றும் பொருட்களின் போக்குவரத்து தடையின்றித் தொடர்வதை உறுதி செய்வதே இதன் பணியாகும். அதே வேளையில், பாதுகாப்பில் எந்த சமரசமும் செய்யப்படாது மற்றும் வருவாய் வசூலில் கசிவு ஏற்படாது,” என்று அவர் கூறினார்.

மலேசியாவின் எல்லைகளில் பாதுகாப்பை வலுப்படுத்துவதற்கும், எல்லைப் பாதுகாப்புப் படையினரின் பாதுகாப்பை உறுதி செய்வதற்கும் அரசாங்கம் கொண்டுள்ள உறுதிப்பாட்டை அமைச்சர் மீண்டும் வலியுறுத்தினார்.