ஒவ்வொரு ஆண்டும் 5,500 பயிற்சி மாணவர்கள் செவிலியர் டிப்ளமோ (Diploma in Nursing) படிப்பில் சேர இலக்கு நிர்ணயிக்கப்பட்டுள்ளதாக சுகாதார அமைச்சர் சுல்கேப்ளி அகமது கூறியுள்ளார்.

சுகாதார வசதிகளில் தற்போது 10,557 செவிலியர் காலியிடங்கள் உள்ளதாக சுகாதார அமைச்சர் சுல்கேப்ளி அகமத் தெரிவித்துள்ளார்.

மூன்று முக்கிய உத்திகளை வலுப்படுத்துவதன் மூலம் செவிலியர்களின் தீவிர பற்றாக்குறையைச் சமாளிக்க சுகாதார அமைச்சகம் நடவடிக்கை எடுத்து வருகிறது.

செவிலியர் பட்டதாரிகளின் எண்ணிக்கையை அதிகரித்தல், தொழில்முறைப் பாதைகளை விரிவுபடுத்துதல், நேரடியாகப் பணியமர்த்துதல் மற்றும் பணியாளர் நிர்வாகத்தில் அதிக அதிகாரத்தைப் பயன்படுத்துதல் ஆகியவை இதில் அடங்கும் என்று சுகாதார அமைச்சர் சுல்கேப்ளி அகமத் (Dzulkefly Ahmad) தெரிவித்தார்.

கோத்தா கினபாலுவில் இன்று நடைபெற்ற சுகாதார அமைச்சக பயிற்சி நிறுவனத்தின் (ILKKM) பட்டமளிப்பு விழாவில் அவர் பேசியதாக பெர்னாமா செய்தி நிறுவனம் செய்தி வெளியிட்டுள்ளது. அதில், மொத்தம் உள்ள 73,281 கிரேடு U5 செவிலியர் பணியிடங்களில், சுகாதார நிலையங்களில் தற்போது 10,557 காலிப்பணியிடங்கள் உள்ளதாக அவர் குறிப்பிட்டுள்ளார்.

கடந்த ஆண்டிலிருந்து செவிலியர் பயிற்சியாளர்களின் சேர்க்கை ஆண்டுக்கு 3,000 ஆக உயர்த்தப்பட்டுள்ளதாக சுல்கேப்ளி கூறினார்.

இந்த உத்தியை மேலும் விரிவுபடுத்த, அரசு மற்றும் தனியார் உயர்கல்வி நிறுவனங்களுக்கு ஆண்டுக்கு 2,000 பயிற்சியாளர்களை வெளிப்படைச் சேவைகள் (outsource) மூலம் சேர்க்க அமைச்சகம் இலக்கு வைத்துள்ளது.

மேலும், குவாந்தான், கோலா திரங்கானு, மூவார் மற்றும் பினாங்கு ஆகிய இடங்களில் உள்ள நான்கு ILKKM கிளைகள் அக்டோபர் 2027-க்குள் மீண்டும் திறக்கப்படும் என்றும், இதன் மூலம் கூடுதலாக 500 பயிற்சியாளர்களுக்கு இடம் கிடைக்கும் என்றும் அவர் கூறினார்.

“இதன் மூலம் ஒவ்வொரு ஆண்டும் மொத்தம் 5,500 பயிற்சியாளர்கள் செவிலியர் பட்டயப் படிப்பை மேற்கொள்ள முடியும்,” என்று அவர் மேலும் கூறினார்.

இரண்டாவது உத்தியாக, ஊழியர்கள் தங்கள் பணிபுரியும் இடத்தை விட்டு நீண்ட காலம் வெளியேறாமல் தங்கள் திறன்களை மேம்படுத்திக் கொள்ள ஏதுவாக, இந்த செப்டம்பரில் 15 பணிசார் பயிற்சித் திட்டங்களை (on-the-job training) அமைச்சகம் அறிமுகப்படுத்தும் என்று சுல்கேப்ளி தெரிவித்தார்.

“சமூகச் செவிலியர்கள் மாறுதல் பட்டயம் (Transition Diploma) மூலம் முழு நேரச் செவிலியர்களாக மாறுவதற்கான தொழில்முறைக் கதவுகளையும் அமைச்சகம் விரிவுபடுத்தி வருகிறது.”

மூன்றாவது உத்தியின் கீழ், தகுதியுள்ள ILKKM செவிலியர் பட்டயப் படிப்பு முடித்தவர்களுக்கு இடைக்கால ஒப்பந்த நியமனங்களில் இருந்து விலக்கு அளிக்க பொதுச் சேவைத் துறை ஒப்புதல் அளித்துள்ளதாக சுல்கேப்ளி தெரிவித்தார்.

இதன் பொருள், ILKKM செவிலியர் பட்டயப் படிப்பை வெற்றிகரமாக முடித்து, மலேசிய செவிலியர் வாரியத்தில் பதிவு செய்த அனைத்து பட்டதாரிகளும் நேரடியாக நிரந்தரப் பணியிடங்களில் சேர்த்துக்கொள்ளப்படுவர்.

கடந்த ஜூலை 9 முதல், அதிகாரத்துவ நடைமுறைகளைக் குறைக்கவும், தகுதியான பணியாளர்களை நேரடியாகப் பணியமர்த்துவதற்கு வசதியாகவும், பணியாளர் நிர்வாகத்தில் அமைச்சகத்திற்குத் தன்னாட்சி அதிகாரம் வழங்கப்பட்டுள்ளதாகவும் சுல்கேப்ளி கூறினார்.