மத்திய டிஜிட்டல் துறை அமைச்சரும், டிஏபி (DAP) கட்சியின் தேசியத் தலைவருமான கோவிந்த் சிங் தியோ, இந்து மதச் சின்னங்களை அவமதிப்பவர்கள் மீது காவல்துறை உடனடி நடவடிக்கை எடுக்க வேண்டும் என்று வலியுறுத்தியுள்ளார்.

நேற்று நடைபெற்ற அமைச்சரவைக் கூட்டத்தில் இந்த விவகாரம் குறித்து விவாதிக்கப்பட்டதைத் தொடர்ந்து அவர் இந்த அறிக்கையை வெளியிட்டுள்ளார்.

இந்த விவகாரத்தில் அரசாங்கத்தின் நிலைப்பாடு மிகவும் “தெளிவாக” உள்ளது என்று குறிப்பிட்ட கோவிந்த் சிங் தியோ, பொதுமக்களின் நம்பிக்கையை மீட்டெடுப்பதற்கும், அமைதியைக் குலைக்க நினைப்பவர்களிடமிருந்து நாட்டைக் காப்பதற்கும் அமலாக்கத் துறையினர் உரிய நடவடிக்கை எடுக்க வேண்டும் என்றார்.

காவல்துறையின் கடமை: “அமைதியைப் பேணுவதும், பொது ஒழுங்கைப் பாதுகாப்பதும் காவல்துறையின் கடமையாகும். இது சமரசம் செய்ய முடியாத ஒரு அடிப்படைப் பொறுப்பு,” என்று அவர் சுட்டிக்காட்டினார்.

நடவடிக்கை இல்லாமை குறித்த கவலை: சமீபகாலமாக, இனவெறியைத் தூண்டுபவர்கள் மீது நடவடிக்கை எடுக்கப்படாதது நாட்டில் அவ்வப்போது பதற்றத்தை ஏற்படுத்தி, நாட்டின் நிலைத்தன்மைக்கு அச்சுறுத்தலாக அமைந்துள்ளதாக அவர் கவலை தெரிவித்தார்.

சமமான நீதி: திருக்குர்ஆனை மிதித்த நபர் மீது விரைவாக சட்ட நடவடிக்கை எடுக்கப்பட்டதை உதாரணமாகக் குறிப்பிட்ட அவர், அதேபோல் இந்து மதத்தின் புனிதச் சின்னமான சூலத்தை அவமதிப்பவர்கள் மீதும் அதே வேகத்தில் நடவடிக்கை எடுக்கப்பட வேண்டும் என்று வலியுறுத்தினார்.

“நாட்டின் அமைதியைக் குலைக்க முயற்சிப்பவர்களிடமிருந்து பொதுமக்களைப் பாதுகாப்பது காவல்துறையின் மிக முக்கியமான பொறுப்பாகும்.”

“இதுபோன்ற சந்தர்ப்பங்களில் நடவடிக்கை எடுக்கத் தவறுவது இனங்களுக்கு இடையிலான பதற்றத்தை அதிகரிக்க வழிவகுக்கும். நாம் இன நல்லிணக்கத்தையும் ஒற்றுமையையும் பேண வேண்டும். அதற்குச் சட்டத்தைப் பயமோ அல்லது பாரபட்சமோ இன்றி நிலைநிறுத்தி அமல்படுத்துவதே ஒரே வழியாகும்”.

மத அடையாளங்களை அவமதித்தவர்களை உடனடியாக அடையாளம் கண்டு நீதிமன்றத்தில் நிறுத்த உரிய நடவடிக்கை எடுக்குமாறு நான் காவல்துறைத் தலைவரை (IGP) கேட்டுக்கொள்கிறேன். மலேசியா சட்டமற்ற நிலைக்குச் செல்வதையோ அல்லது இனக்கலவரத்தில் ஈடுபடுவதையோ தாங்கிக்கொள்ள முடியாது,” என்று அவர் மேலும் கூறினார்.

‘துருப்பிடித்த இரும்புத் துண்டு’

சமீப நாட்களாக, லங்காவி ஸ்ரீ முனீஸ்வரர் ஆலயத்தில் உள்ள சூலாயுதத்தை அவமதித்ததாகக் கூறப்படும் நில ஆர்வலர் என்று தன்னைத் தானே அறிவித்துக்கொண்ட தமீம் தஹ்ரி அப்துல் ரசாக் மீதான குற்றச்சாட்டைத் தொடர்ந்து பதற்றம் அதிகரித்துள்ளது.

தான் மிதித்ததாகப் படம்பிடிக்கப்பட்ட அந்தப் பொருள் ஒரு வெற்று நிலத்தில் கிடந்த துருப்பிடித்த இரும்புத் துண்டு என்று தான் கருதியதாகத் தமீம் கூறினார். மேலும், அந்த இடம் “வழிபாட்டுத் தலம் அல்ல” என்றும் அவர் வலியுறுத்தினார்.

இந்திய சமூக ஆர்வலர் உமாகாந்தன் கிருஷ்ணன், தமீமின் விளக்கத்தை மறுத்துள்ளார். அந்தப் பகுதி கோயிலுக்குச் சொந்தமான நிலம் என அறிவிக்கும் பெரிய பெயர்ப்பலகை அங்கு இருப்பதாகவும் அவர் உறுதிப்படுத்தியுள்ளார்.

தமீமின் செயல்கள் குறித்த வீடியோ சமூக வலைதளங்களில் பரவி பெரும் கண்டனத்தைப் பெற்றது. ஜெலுத்தோங் நாடாளுமன்ற உறுப்பினர் ஆர்.எஸ்.என். ராயர், தமீமுக்கு எதிராக ஏன் நடவடிக்கை எடுக்கப்படவில்லை என்பது குறித்து விளக்கம் அளிக்குமாறு உள்துறை அமைச்சர் சைபுதீன் நசுத்தியான் இஸ்மாயில் மற்றும் காவல்துறை மாபெரும் தலைவர் (IGP) காலித் இஸ்மாயில் ஆகியோரை வலியுறுத்தினார்.

தமீமைக் கைது செய்து குற்றம் சாட்டுவதில் ஏற்படும் தாமதம் “இரட்டை நிலப்பாடாக” பார்க்கப்படும் என்று ராயர் எச்சரித்தார். இதற்கு முன்பு பல்கலைக்கழக மாணவர் ஒருவர் குர்ஆனை மிதித்த வழக்கில் அதிகாரிகள் மிக விரைவாக நடவடிக்கை எடுத்ததை அவர் சுட்டிக்காட்டினார்.

இதற்கிடையில், மற்றொரு நபர் குர்ஆனை அவமதித்து மிதித்ததாகக் கூறப்படும் சம்பவம் குறித்தும் நேற்று முதல் பரவலான கண்டனங்கள் எழுந்துள்ளன.

‘சமரசம் கிடையாது’

இந்து மற்றும் முஸ்லிம் சமூகங்களைப் பாதிக்கும் இந்தச் சம்பவங்கள் குறித்து கருத்து தெரிவித்த புக்கிட் பெண்டேரா நாடாளுமன்ற உறுப்பினர் ஷெர்லினா அப்துல் ரஷித், எந்த மதத்தையும் இழிவுபடுத்துபவர்களுக்கு எதிராக எவ்வித சமரசமும் செய்யக்கூடாது என்று கூறினார்.

இத்தகையச் செயல்கள் மோதலாக உருவெடுப்பதைத் தடுக்க தகுந்த நடவடிக்கை எடுக்கப்பட வேண்டும் என்று வலியுறுத்திய அவர், ஒரு மதத்தை இழிவுபடுத்துவதற்கு முன்பு சம்பந்தப்பட்டவர்கள் “சரியாகச் சிந்தித்து, இருமுறை யோசிக்க வேண்டும்” என்றும், அவ்வாறு செய்பவர்கள் நிச்சயம் வேட்டையாடப்பட்டு, கைது செய்யப்பட்டு, தண்டிக்கப்படுவார்கள் என்றும் எச்சரித்தார்.

பினாங்கு புக்கிட் பெண்டேரா நாடாளுமன்ற உறுப்பினர் சியர்லீனா அப்துல் ரஷீத்

இத்தகைய சம்பவங்களுக்கு எதிராக “சட்டத்தின் முழு பலத்தையும்” பயன்படுத்த வேண்டும் என்று கட்சியின் பாங்கி நாடாளுமன்ற உறுப்பினர் ஷாரெட்சான் ஜோஹான் அழைப்பு விடுத்துள்ளார். இனத் தூண்டல் மற்றும் மத நிந்தனை போன்ற பிரச்சினைகள் பெரிய மோதல்களாக உருவெடுப்பதற்கு முன்பு, அவற்றை விரிவான முறையில் கையாள்வதை உறுதி செய்ய இத்தகைய நடவடிக்கைகள் மிக அவசியம் என்று அவர் குறிப்பிட்டார்.

திருக்குர்ஆனை அவமதிக்கும் செயல்கள் இனி தனிப்பட்ட சம்பவங்களாக மட்டும் இல்லை என்ற கவலையை எழுப்பிய DAP மத்திய செயற்குழு உறுப்பினர் ஷேக் உமர் பகாரிப் அலி, மத உணர்வுகளை சவால் செய்வதற்கு சில தரப்பினர் பெருகிய முறையில் துணிச்சல் பெற்று வருவதையே சமீபத்திய நிகழ்வு நிரூபிக்கிறது என்று கூறினார்.

திருக்குர்ஆனை அவமதிக்கும் வகையில் சமூக ஊடகத்தில் பதிவிடப்பட்டதாகக் கூறப்படும் ஒரு பதிவு நீக்கப்பட்டுள்ளதாகவும், அதனுடன் தொடர்புடைய கணக்கைக் கண்டறிய முடியவில்லை என்றும் நேற்று MCMC (மலேசிய தொடர்பு மற்றும் பல்லூடக ஆணையம்) தெரிவித்தது.

இருப்பினும், இது தொடர்பாக உடனடி மற்றும் கடுமையான நடவடிக்கை எடுக்கப்படுவதை உறுதி செய்ய காவல்துறையுடன் இணைந்து பணியாற்றி வருவதாக ஆணையம் உறுதி அளித்துள்ளது.