கடந்த இரண்டு பருவங்களாக 600 ரிங்கிட் நெல் அறுவடை ஊக்கத்தொகை வழங்குவதை நிறுத்திவிட்டதாகக் கூறப்படும் புகார்களை விவசாய மற்றும் உணவுப் பாதுகாப்பு அமைச்சகம் மறுத்துள்ளது.
இது தொடர்பாக அவ்வமைச்சு வெளியிட்டுள்ள அறிக்கையில், இந்த ரொக்க ஊக்கத்தொகை என்பது 2023 மற்றும் 2024 ஆகிய ஆண்டுகளுக்கு மட்டுமே வழங்கப்பட்ட ஒருமுறை சிறப்பு உதவியாகும் என்றும், இது 2025 அல்லது 2026 வரவுசெலவுத் திட்டங்களில் சேர்க்கப்படவில்லை என்றும் தெரிவித்துள்ளது.
“எனவே, எதிர்க்கட்சிகளால் மிகைப்படுத்தப்படுவது போல, நிலுவையில் உள்ள கொடுப்பனவுகள் குறித்த கேள்விக்கே இடமில்லை” என்று அந்த அறிக்கை கூறியுள்ளது.
விவசாயிகள் மற்றும் பொதுமக்களிடையே குழப்பத்தைத் தவிர்க்க, அரசாங்கத்தின் கொள்கைகள் குறித்த உண்மைகளின் அடிப்படையிலேயே கருத்துக்கள் தெரிவிக்கப்பட வேண்டும் என்பது முக்கியம்.
நேற்று, எதிர்க்கட்சித் தலைவர் ஹம்சா சைனுடின், கடந்த இரண்டு பருவங்களாக விவசாயிகளுக்கு இந்த ஊக்கத்தொகை வழங்கப்படவில்லை என்ற புகார்கள் குறித்து அரசாங்கம் விளக்கம் அளிக்க வேண்டும் என்று கோரிக்கை விடுத்திருந்தார்.
மேலும், டீசல் விலை உயர்வு உணவு விநியோக நெருக்கடிக்கு வழிவகுக்கும் என்று எச்சரித்த லாருட் நாடாளுமன்ற உறுப்பினரான அவர், இதனால் நெல் விவசாயிகள் கடுமையாகப் பாதிக்கப்படுவார்கள் என்பதால் டீசல் விலை உயர்வை உடனடியாகக் கவனிக்குமாறு அரசாங்கத்தை வலியுறுத்தினார்.
மேற்கு மலேசியாவில் டீசல் விலை மார்ச் நடுப்பகுதியில் லிட்டருக்கு 3.92 ரிங்கிட்டாக இருந்த நிலையில், தற்போது ஏப்ரல் 1 வரை லிட்டருக்கு 5.52 ரிங்கிட்டாக நிர்ணயிக்கப்பட்டுள்ளது. இது லிட்டருக்கு 1.60 ரிங்கிட் உயர்வாகும்.
டீசல் விலை உயர்வால் அதிகரித்துள்ள செயல்பாட்டுச் செலவுகள் குறித்த கவலைகளை ஏற்றுக்கொண்ட அமைச்சு, இது தொடர்பாக நிதி அமைச்சிற்குப் பரிந்துரைகளை வழங்குவதற்கு முன் இந்த விவகாரம் கவனமாக ஆய்வு செய்யப்பட்டு வருவதாகத் தெரிவித்தது.
மேலும், நாட்டின் நெல் மற்றும் அரிசி உற்பத்தி அல்லது விநியோகச் சங்கிலியில் ஏதேனும் இடையூறுகள் ஏற்பட்டால், 1994-ஆம் ஆண்டு நெல் மற்றும் அரிசி கட்டுப்பாட்டுச் சட்டத்தின் கீழ் தாம் தலையிட முடியும் என்றும் அவ்வமைச்சு குறிப்பிட்டது.
உலகளாவிய விலை உயர்வு இருந்தபோதிலும், விதைகள், உரங்கள் மற்றும் பூச்சிக்கொல்லி மருந்துகளுக்கான மானியங்கள் பாதிக்கப்படாது என்றும், அவை தொடர்ந்து வழங்கப்படும் என்றும் அமைச்சகம் தெரிவித்துள்ளது.
-fmt
