மலேசியாவின் தொழிலாளர் சந்தையை வங்காளதேசத் தொழிலாளர்களுக்காக மீண்டும் திறக்கும் பணிகளை அந்தந்த துறைகளின் தேவைக்கேற்ப விரைவுபடுத்த மலேசியாவும் வங்காளதேசமும் ஒப்புக்கொண்டுள்ளன.

இதில் இடைத்தரகர்களின் பங்கைக் குறைத்தல், செலவுகளைக் குறைத்தல் மற்றும் அங்கீகரிக்கப்பட்ட, தகுதியுள்ள ஆள்சேர்ப்பு முகமைகளைப் பயன்படுத்துதல் ஆகியவை அடங்கும்.

புத்ராஜெயாவில் இன்று பிரதமர் அன்வார் இப்ராஹிம் மற்றும் வங்காளதேசத்தின் வெளிநாடு வாழ் நலன் மற்றும் வெளிநாட்டு வேலைவாய்ப்புத் துறை அமைச்சர் அரிபுல் ஹக் சௌத்ரி தலைமையிலான குழுவினருக்கும் இடையே நடைபெற்ற சந்திப்பின் முக்கிய முடிவுகளில் இதுவும் ஒன்று என மனிதவளத்துறை அமைச்சர் ஆர். ரமணன் தெரிவித்தார்.

மார்ச் 1, 2023 அன்று, வெளிநாட்டுத் தொழிலாளர் வேலைவாய்ப்புத் தளர்வுத் திட்டம் உட்பட அனைத்துத் துறைகளுக்குமான வெளிநாட்டுத் தொழிலாளர் ஒதுக்கீடு விண்ணப்பங்கள் மற்றும் ஒப்புதல்கள் நிறுத்தி வைக்கப்பட்டன.

சர்வதேச தொழிலாளர் அமைப்பின் “முதலாளியே பணம் செலுத்துதல்” கொள்கைக்கு ஏற்ப, ஆள்சேர்ப்புச் செலவுகளை முதலாளிகளே ஏற்பதை உறுதி செய்யும் நோக்கில், தொழில்நுட்பம் மற்றும் செயற்கை நுண்ணறிவு (AI) அடிப்படையிலான ஆள்சேர்ப்பு முறைக்கான திட்டங்களை மலேசியா முன்வைத்துள்ளதாகவும் ரமணன் தெரிவித்தார்.

இந்த முயற்சிக்கு வங்காளதேசம் தனது முழு ஆதரவையும், அதைச் செயல்படுத்துவதில் ஒத்துழைக்கத் தயாராக இருப்பதையும் தெரிவித்ததாக அவர் மேலும் கூறினார்.

ஆள்சேர்ப்பு முறையில் உள்ள சட்ட சிக்கல்கள் மற்றும் மனிதக் கடத்தல் தொடர்பான கவலைகள் குறித்தும் இந்தச் சந்திப்பில் விவாதிக்கப்பட்டதாக ரமணன் தெரிவித்தார்.

“சட்டத்தின் ஆட்சியை நிலைநிறுத்துதல், வெளிப்படையான நீதிச் செயல்முறைகளை உறுதி செய்தல் மற்றும் இரு நாடுகளின் சர்வதேச நற்பெயரைப் பாதுகாத்தல் ஆகியவற்றின் முக்கியத்துவத்தை இரு தரப்பினரும் வலியுறுத்தினர்.

“கூடுதலாக, தொழில்துறை தேவைகளுக்கும் பணியாளர்களுக்கும் இடையே சிறந்த பொருத்தத்தை உறுதி செய்யவும், அதன் மூலம் உற்பத்தித்திறனை அதிகரிக்கவும் – திறன் மேம்பாடு, பயிற்சி, சான்றிதழ் மற்றும் தகவல் பகிர்வு ஆகியவற்றில் ஒத்துழைப்பதும் வலியுறுத்தப்பட்டது,” என்று அவர் தனது முகநூல்  பதிவில் குறிப்பிட்டுள்ளார்.

ஒப்புக்கொள்ளப்பட்ட அனைத்து திட்டங்களும் தடையின்றி செயல்படுத்தப்படுவதை உறுதி செய்ய, தொடர்ச்சியான கலந்துரையாடல் அமர்வுகள் நடத்தப்படும் என்று ரமணன் கூறினார்.

“இந்த ஒத்துழைப்பு, மிகவும் நியாயமான, நிலையான மற்றும் உலகளாவிய ரீதியில் போட்டித்தன்மை கொண்ட ஒரு தொழிலாளர் குடியேற்ற முறையை உருவாக்குவதற்கான இரு நாடுகளின் கூட்டு உறுதிப்பாட்டைப் பிரதிபலிக்கிறது,” என்று அவர் தெரிவித்தார்.

 

 

 

-fmt