மது அல்லது போதைப்பொருள் உட்கொண்டு வாகனம் ஓட்டுவதால் பிறருக்குப் பாதிப்பை ஏற்படுத்தும் வாகன ஓட்டிகள், பாதிக்கப்பட்டவர்களுக்கு இழப்பீடு வழங்குவதைக் கட்டாயமாக்கும் வகையில் சாலைப் போக்குவரத்துச் சட்டம் திருத்தப்படும் என்று பிரதமர் அன்வார் இப்ராஹிம் இன்று அறிவித்துள்ளார்.

2027ஆம் ஆண்டுக்கான வரவு செலவுத் திட்டத்தை மக்களவையில் தாக்கல் செய்தபோது, மதுபானம் அல்லது போதைப்பொருளின் தாக்கத்தில் வாகனம் ஓட்டியதால் ஏற்பட்ட 28 உயிரிழப்பு சம்பவங்கள் ஆகஸ்ட் மாதம் வரை பதிவாகியுள்ளதாக அன்வார் தெரிவித்தார்.

இது உண்மையிலேயே நமது மனசாட்சியை உலுக்கும் ஒரு விஷயமாகும். சட்ட அமலாக்க நடவடிக்கைகள் கடுமையாக்கப்பட்டிருந்தாலும், விதிமீறல்கள் தொடர்ந்து கவலையளிக்கும் வகையில் உள்ளன.

“எனவே, மேலும் கடுமையான நடவடிக்கையாக, மது அல்லது போதைப்பொருளின் தாக்கத்தில் வாகனம் ஓட்டும் ஓட்டுநர்கள் பாதிக்கப்பட்டவர்களுக்கு இழப்பீடு வழங்குவதைக் கட்டாயமாக்கும் வகையில் சாலைப் போக்குவரத்துச் சட்டத்தை அரசாங்கம் திருத்தும்,” என்று அவர் கூறினார்.

இந்த அறிவிப்பு, இந்த ஆண்டில் மது அல்லது போதைப்பொருளின் தாக்கத்தில் வாகனம் ஓட்டியதாகச் சந்தேகிக்கப்படும் அல்லது உறுதிப்படுத்தப்பட்ட ஓட்டுநர்கள் சம்பந்தப்பட்ட பல உயிரிழப்பு விபத்துகள் நிகழ்ந்ததைத் தொடர்ந்து வெளியாகியுள்ளது.

அவற்றில் ஒன்றாக, மார்ச் 29ஆம் தேதி கிள்ளானில் நிகழ்ந்த விபத்தில் 33 வயதான மோட்டார் சைக்கிள் ஓட்டுநர் அமிருல் ஹபீஸ் ஒமார் உயிரிழந்தார். எதிர்த்திசைச் சாலையில் நுழைந்த கார் ஒன்று அவரது மோட்டார் சைக்கிள் மீது மோதியதில் இந்த விபத்து நிகழ்ந்தது. அந்தக் கார் ஓட்டுநர் மது மற்றும் போதைப்பொருள் உட்கொண்டிருந்தது பரிசோதனையில் உறுதிப்படுத்தப்பட்டதாக காவல்துறையினர்  தெரிவித்தனர்.

மற்றொரு சம்பவம் மே மாதம் கிள்ளானில் நிகழ்ந்தது. 27 வயதான ஸுல்பிகார் ஸாமிர் அமிருல் நிஸாம் என்பவர், எதிர்த்திசையில் பல கிலோமீட்டர் தூரம் காரை ஓட்டிச் சென்றதாகக் கூறப்படும் போதையில் இருந்த ஓட்டுநரின் வாகனத்துடன் மோதியதைத் தொடர்ந்து, 13 நாட்கள் கோமா நிலையில் இருந்த பின்னர் உயிரிழந்ததாகத் தெரிவிக்கப்பட்டது.

ஜூலை மாதம், ஜனவரி 1ஆம் தேதி முதல் மே 31ஆம் தேதி வரையிலான காலப்பகுதியில் மது அல்லது போதைப்பொருளின் தாக்கத்தில் வாகனம் ஓட்டியவர்களால் ஏற்பட்ட 48 விபத்துகளில், 24 விபத்துகள் உயிரிழப்புகளை ஏற்படுத்தியதாகப் போக்குவரத்து அமைச்சர் அந்தோணி லோக் நாடாளுமன்றத்தில் தெரிவித்திருந்தார்.

அதே ஐந்து மாத காலப்பகுதியில், போதையில் வாகனம் ஓட்டிய குற்றச்சாட்டில் 912 வாகன ஓட்டிகளை காவல்துறையினர் கைது செய்திருந்தனர்.

வாகனத் தொலைத்தொடர்பு கண்காணிப்பு அமைப்புகள்

வணிக வாகனங்களில் வேகம், இருப்பிடம் மற்றும் ஆபத்தான வாகன ஓட்டும் முறைகளைக் கண்காணிப்பதற்கான தொலைத்தொடர்பு கண்காணிப்பு அமைப்புகளை (Telematics Systems) கட்டாயமாகப் பொருத்த வேண்டும் என்றும் அன்வார் இன்று அறிவித்தார். இதில் மது அருந்தியிருப்பதைக் கண்டறியும் அமைப்புகளும் உள்ளடங்கும்.

இதற்கிடையில், வணிக வாகன ஓட்டுநர்களின் பாதுகாப்பான வாகன ஓட்டும் திறனைப் பாதிக்கக்கூடிய மருத்துவப் பிரச்சினைகளைக் கண்டறிவதற்காக, சமூகப் பாதுகாப்பு நிறுவனம் (Socso) அவர்களுக்கு சுகாதாரப் பரிசோதனை வவுச்சர்களை வழங்கும்.

மது அல்லது போதைப்பொருள் உட்கொண்டு வாகனம் ஓட்டுபவர்களுக்கு எதிராகக் கடுமையான நடவடிக்கைகள் எடுக்கப்பட வேண்டும் என்ற கோரிக்கைகள் பல மாதங்களாக முன்வைக்கப்பட்டு வருகின்றன.

மார்ச் மாதம், அம்னோ இளைஞர் பிரிவுத் தலைவர் டாக்டர் அக்மல் சாலே, பாதிக்கப்பட்டவர்களின் குடும்பங்களுக்கு இழப்பீடு வழங்குவதை அரசாங்கம் கட்டாயமாக்க வேண்டும் என்று வலியுறுத்தினார். அதேவேளையில், உயிரிழப்பை ஏற்படுத்தும் இத்தகைய சம்பவங்கள் குற்ற நோக்கமின்றி நிகழ்ந்த சாதாரண விபத்துகளாகக் கருதப்படாமல், மனித உயிரிழப்பை ஏற்படுத்தும் குற்றமாக (Culpable Homicide) கருதப்பட வேண்டும் என்று அபிம் அமைப்பும் கோரிக்கை விடுத்தது.

வலுவான தடுப்பு எச்சரிக்கையை ஏற்படுத்த தற்போதைய தண்டனைகளை அரசாங்கம் மறுபரிசீலனை செய்ய வேண்டும் என சட்ட மற்றும் நிறுவன சீர்திருத்த அமைச்சர் அஸாலினா ஒத்மான் சைத் முன்னர் தெரிவித்துள்ளார்.