பிகேஆர் தலைவர் வான் அஸிசா வான் இஸ்மாயிலை சிலாங்கூர் மாநில மந்திரி புசார் வேட்பாளராக பக்கத்தான் தலைமைத்துவ மன்றம் தீர்மானித்த போது அதனை ஏற்றுக்கொண்ட பாஸ் கட்சி தலைவர் அப்துல் அவாங் ஹாடி இப்போது அஸிசாவின் செயல்திறன் மீது கரிப்பூசுகிறார்.

அஸிசாவின் நாடாளுமன்ற சேவை தரமற்றது. அதனைவிட பெரும் பொறுப்பு மிக்க எம்பி பதவிக்கு அவர் தகுதியற்றவர் என்றார் ஹாடி.

“தொடக்கத்திலிருந்தே, நாடாளுமன்றத்தில் கேள்வி கேட்பதற்கோ பதில் அளிப்பதற்கோ திறனற்றவர், மாநில சட்டமன்றத்தில் கேள்வி கேட்க அல்லது எதிரணித் தலைவருடன் விவாதம் நடத்த இயலாதவர், எப்படி தலைவராவது?

“அது இயலாது”, என்று கட்சி ஆதரவாளர்களுக்கு மாராங்கில் விளக்கம் அளித்த போது கூறினார்.

மந்திரி புசாராவதற்கு பல தகுதிகள் இருக்க வேண்டும். அதில் ஆணா, பெண்ணா என்பது ஒன்றல்ல.

“ஆகவே, அவரை ஒரு வேட்பாளராக நிராகரித்தோம். அவர் தொடக்கத்திலிருந்தே தகுதியற்றவராக இருந்தார். அவர் ஒரு பெண் என்பதாலல்ல.

“(அவர்) சிலாங்கூர் மாநில நிர்வாகத்தை கையாளுவதற்கான திறமையற்றவர். சிலாங்கூரின் நலன் பேணுவதற்கு வலுவானவர் தேவைப்படுகிறது”, என்று ஹாடி கூறின்ஆர்.