கோவிட்-19 சிறப்பு உதவியின் (பிகேசி) 2 -ஆம் கட்டத்திற்கான நிதி, இந்த வியாழன் (நவம்பர் 25) முதல் RM300 மில்லியன் ஒதுக்கீட்டில் வழங்கப்படும்.

பிரதமர் இஸ்மாயில் சப்ரி யாகோப் இன்று வெளியிட்டுள்ள அறிக்கையில், இரண்டாவது கொடுப்பனவில் 700,000 வீட்டுப் பெறுநர்கள், தனி நபர்கள் மற்றும் ஏழைப் பிரிவைச் சேர்ந்த மூத்த குடிமக்கள் ஈடுபடுத்தப்படுவார்கள் என்று கூறினார்.

“அனைவருக்கும் தெரியும், பிகேசி -இன் கட்டம் 1 செலுத்துதல் கடந்த செப்டம்பரில் RM3.1 பில்லியன் ஒதுக்கீட்டில் முடிக்கப்பட்டது, இதனால் கிட்டத்தட்ட 10 மில்லியன் பெறுநர்கள் பயனடைந்தனர்.

“அடுத்த கொடுப்பனவு, பிகேசி-இன் கட்டம் 3, டிசம்பரில் அமைக்கப்பட்ட அட்டவணையின்படி செயல்படுத்தப்படும், இதில் 3.8 மில்லியன் ஏழை மற்றும் B40 குடும்பங்களுக்கு RM1.2 பில்லியன் ஒதுக்கீடு செய்யப்படும்,” என்று அவர் கூறினார்.

குடும்பத் தலைவர்கள், மூத்தக் குடிமக்கள் மற்றும் தனி நபர்களுக்கு, அவர்களின் வங்கிக் கணக்குகளில் பணம் தொடர்ந்து வரவு வைக்கப்படும்; சபா மற்றும் சரவாக் உட்பட, வங்கிக் கணக்கு இல்லாத பெறுநர்கள் சிம்பானான் நேஷனல் வங்கிக் (பிஎஸ்என்) கிளைகள் மூலம் பணம் செலுத்தப்படும்.

பிகேசி வலைத்தளம் https://bkc.hasil.gov.my மூலம், பிகேசி ஒப்புதல் நிலையைச் சரிபார்க்கவும்.

அரசாங்கம் எப்போதுமே மக்களின் குறைகளை உணர்ந்து செயல்படுவதாகவும், கோவிட்-19 தொற்றுநோயால் இன்னும் பாதிக்கப்பட்டுள்ள மக்களின் சுமையைப் பிகேசி வழங்குவதன் மூலம் குறைக்க முடியும் என்று நம்புவதாகவும் இஸ்மாயில் சப்ரி வலியுறுத்தினார்.

“மலேசியக் குடும்பங்களின் நல்வாழ்வை உறுதி செய்வதற்காக, வழங்கப்படும் உதவிகளைத் திறம்பட செயல்படுத்துவதை உறுதி செய்வதில் அரசாங்கம் தொடர்ந்து உறுதியுடன் இருக்கும்,” என்று அவர் கூறினார்.

பிகேசி மக்கள் பாதுகாப்பு மற்றும் பொருளாதார மீட்புத் தொகுப்பின் (பெமுலே -PEMULIH) பொருளாதார ஊக்கப் பொதிக்கான கூடுதல் கொடுப்பனவுகளுக்கு கூடுதலான ஒரு பகுதியாகும்.

ஜூன் 28 அன்று, கோவிட்-19 தொற்றுநோயின் விளைவுகளைச் சமாளிப்பதற்கு, மக்களுக்கு விரிவான உதவிகளை வழங்குவதற்கான முயற்சிகளில் ஒன்றாக பெமுலே தொகுப்பை அரசாங்கம் அறிவித்தது.

பிகேசி-இன் கீழ், மிக ஏழை பிரிவினர், குடும்பங்கள் RM1,300 பெறுவார்கள்; தனித்து வாழும் மூத்தக் குடிமக்கள் (RM500) மற்றும் தனித்து வாழ்பவர்கள் (RM500) பெறுவார்கள்.

B40 வகை குடும்பங்கள் RM800, தனித்து வாழும் மூத்தக் குடிமக்கள் (RM200) மற்றும் தனித்து வாழ்பவர்கள் (RM200) பெறும் அதே நேரத்தில் M40, குடும்பங்கள் RM250, தனித்து வாழும் மூத்தக் குடிமக்கள் (RM100) மற்றும் தனித்து வாழ்பவர்கள் (RM100) பெற தகுதியுடையவர்கள் ஆவர்.

• பெர்னாமா